تا ئێستا تەیف سامی بڕیاری ناردنی مووچەی مانگی دووی نەداوە

 

ئاڤا نیوز

کۆبوونەوەی شاندی وەزارەتی دارایی و ئابووری کوردستان لەگەل تەیف سامی، وەزیری دارایی عێراق لەبارەی مووچەی مانگی دوو ئەمڕۆش بەردەوام بوو، بەڵام تا ئێستا بڕیاری ناردنی پارە نەدراوە.

چیرۆکی سەرەکی: ماوەی دوو ڕۆژە شاندێکی تەکنیکی وەزارەتی دارایی و ئابووریی کوردستان بۆ مووچەی مانگی دوو لە بەغدایە بۆ وەڵامدانەوەی پرسیار و تێبینییەکانی وەزیری دارایی لەسەر مووچەی مانگی دوو.

لێدوانی فەرمی: دوو ئەندامی شاندی کوردستان بە ئاڤایان وت، ڕێککەوتنیان کردووە و هەموو شتێکیان تەواو کردووە، هەموو داواکارییەکانی تەیف سامی و وەزارەتی دارایی عێراقیان جێبەجێ کردووە و هیچ شتێک نەماوە تێبینی و سەرنج و پرسیاری لەسەر بێت، تەنیا ناردنی پارە ماوە، بەڵام تا ئێستا تەیف سامی بڕیاری ناردنی نەداوە، شاندی کوردستانیش دەڵێت ناتوانین بڵێین سبەی پارە دەنێردرێت.

ئەمە لەکاتێکدایە دوێنێ بە ئاڤایان وت لە 48 کاتژمێری داهاتوودا دەنێردرێت. ئەمڕۆ ڕۆشت و نەهات، ئێستاش دەڵێن ناتوانین گەرەنتی بدەین سبەی دێت.

زانیاریی زیاتر: شاندەکە تاوەکو ئێستاش لە بەغدایە و نەگەڕاوەتەوە، هیچ دەنگ و ڕەنگێکیان نییە، جاری پێشوو 8 ڕۆژ لە بەغدا بوون، ئەمجارەش لە دوێنێوە لەوێن، بەڵام تا ئیستا تەنانەت ڕاگەیێنراوێکی فەرمیشیان نەبووە، تەنیا بەبێ ئاشکراکردنی ناویان لێدوان بۆ ئاڤا و میدیاکان دەدەن.