وەزارەتی بەرگریی سووریا: هەسەدە ئیدارەی کەمپی هۆل ڕادەستی ئێمە دەکات

ئاڤا نیوز

 

وەزارەتی بەرگریی سووریا چەند بەندێکی نێو ئەو ڕێککەوتنە ئاشکرا دەکات کە لەنێوان سەرۆککۆماری سووریا بۆ قۆناغی ڕاگوزەر و فەرماندەی هێزەکانی سووریای دیموکرات سەبارەت بە یەکخستنی هێزەکانی "هەسەدە" لە دامەزراوە فەرمییەکانی ئەو وڵاتەدا واژۆ کرا.

 

چیرۆکی سەرەکی: ڕۆژی دووشەممە 10-3-2025، مەزڵووم عەبدی، فەرماندەی گشتیی هەسەدە و ئەحمەد شەرع، سەرۆککۆماری سووریا بۆ قۆناغی ڕاگوزەر بە ئاشکرا کۆبوونەوە و ڕێککەوتنێکی هەشت خاڵیان واژۆ کرد.

 

لێدوانی فەرمی: وەزارەتی بەرگریی سووریا بە میدیای عێراقی ڕاگەیاندووە، "هەسەدە بەرە بەرە هەموو شتێک ڕادەستی ئیدارەی دەوڵەتی سووریا دەکات، لەوانەش بەڕێوەبردنی کەمپی هۆل و بەرپرسیارێتی سنووری لەگەڵ عێراق.

زانیاریی زیاتر: وەزارەتەکە ئاماژەی بەوەشکردووە، "هەموو ئەرک و بەرپرسیارێتیەکان لەچوارچێوەی دەوڵەتدا دەبێت، بەگوێرەی ئەو کاتەی دیاریکراوە".

 

بۆچوونی لایەنی بەرامبەر: فەرهاد شامی، وتەبێژی هێزەکانى سووریاى دیموکرات 'هەسەدە' بە ئاڤا میدیای ڕاگەیاند: باسی زیندانەکان بەتایبەت کەمپی هۆل کراوە، بەڵام هیچ ڕێککەوتنێک لەبارەیەوە نەکراوە و هەر لەدەستی ئێمەدایە.

 

ئەوەی پێویستە بیزانیت: وتەبێژی هێزەکانی هەسەدە ئەو دەنگۆیانە ڕەت دەکاتەوە کە باس لەوە دەکەن، هێزەکانی دیمەشق بێنە حەسەکە، بەڵام ڕەنگە هێزەکانی دیمەشق بە هەماهەنگی ئەوان لە سنوورەکانى نێوان ڕۆژئاوا و تورکیا بڵاوەیان پێبکرێت.