پەیامێک لە سووریاوە بۆ عێراق: پێشێلکارییەکان ڕابگرن

ئاڤا نیوز

وەزارەتی دەرەوەی سووریا هێرشکردنەسەر هاووڵاتیانی وڵاتەکەی لە عێراق سەرکۆنە دەکات و بە پێشێلکردنی مافەکانی مرۆڤ ناوی دەبات، داواش لە حکومەتی عێراق دەکات لێپرسینەوە لە هێرشکارەکان بکات و پارێزگاریی لەو سوورییانەش بکات کە لە وڵاتەکەیدا دەژین.

بینراو و بیستراو: هاوکات لەگەڵ گرژییەکانی پارێزگا کەناراوەکانی سووریا و بڵاوبوونەوەی ڤیدیۆی هێرشکردنەسەر خەڵکی عەلەوی، لە کاردانەوەیاندا گرووپە چەکدارە شیعەکانی عێراقیش لە پارێزگاکانی باشوور و ناوەڕاست چونەتەسەر هاووڵاتیانی سووریی و هەراسانیان کردوون، ئەوەش کاردانەوەی لەناوخۆی عێراق و دەرەوەش لێکەوتووەتەوە.

ڕاگەیێنراوی فەرمی: وەزارەتی دەرەوەی سووریا لە ڕاگەیێنراوێکدا ڕایگەیاند:

٠ ئەوەی سوورییەکان لە عێراق ڕووبەڕووی بوونەتەوە سەرکۆنەی دەکەین و بە پێشێلکردنی مافەکانی مرۆڤ و یاسای نێودەوڵەتی دەزانین.

٠ داوا لە حکومەتی عێراق دەکەین لێپرسینەوە لە ئەنجامدەرانی ئەو تاوانانە بکات و هەموو ڕێکارێکی پێویستیش بۆ پارێزگاریکردن لەو سووریانە بگرێتەبەر کە لە عێراق دەژین.

٠ لەنزیکەوە لەگەڵ حکومەتی عێراق کاردەکەین بۆ گرتنەبەری ڕێکاری بەپەلە بۆ چارەسەری ئەو پێشێلکارییانە و دووبارە نەبوونەوەیان، باوەڕیشمان بە توانای حکومەتی عێراق هەیە بۆ سەپاندنی یاسا و پاراستنی هەموو ڕەوەندی کۆمەڵگاکان کە لە چوارچێوەی خاکەکەیدا دەژین