ژمارەیەک کارمەندی شارەوانی تکریت دەستگیردەکرێن

ئاڤا نیوز

لەسەر ساختەکردنی پسوولەی چاککردنەوەی کەلوپەلەکانی شارەوانی تکرتت، دەستەی دەستپاکی عێراق ژمارەیەک کارمەندی شارەوانی دەستگیرد دەکات.

چیرۆکی سەرەکی: دەستگیرکردنى 27 کارمەندى شارەوانى تکریت لەلایەن دەستەى دەستپاکى عێراق، دواى ئەوە دێت کە دەرکەوت پسوولەى چاککردنەوەى کەلوپەلەکانى شارەوانییان ساختە کردووە.

ڕاگەیێنراوی فەرمی: دەستەى دەستپاکى عێراق، ڕایگەیاند، تیمێک لە فەرمانگەی لێکۆڵینەوەی سەڵاحەدین پێکهێنراوە، بە سەرپەرشتی راستەوخۆی دادوەری دادگای لێکۆڵینەوەی دەستپاکی لە سەلاحەدین، دوای ئەنجامدانی لێکۆڵینەوە و وردبینی لە هەزار و 650  پسوولە، توانراوە ژمارەیەکى زۆر پسوولەى ساختەى پاراستن و چاککردنەوەى ئامێرەکانى شارەوانى لە ساڵانى 2020 بۆ 2024، ئاشکرا بکەن.

زانیاریی زیاتر:  پسوولەکان لەلایەن سەرۆک و ئەندامانی لیژنەکانی کڕین و وەرگرتن و وردبینی و فرۆشگاکانەوە رێکخراون، بەوهۆیەوە 27 کارمەندى شارەوانى تکریت دەستگیرکراون.

ئەمەش بزانە: تیمەکە دوای بەستنەوەی زانیاری و تۆمارکردنی لێدوانی شایەتحاڵەکان، ڕوویان لە قایمقامیەتی بەغدا و کەرکوک کردووە، جگە لە قەزاکانی تکریت و سامەڕا، بۆ کۆنترۆڵکردنی ئەو پسوولەی کە گوایە لە لایەن دوکانەکانی ئەو قایمقامیەتانە دەرچووە، تۆمەتباران 211 پسوولەیان لە ساڵى 2020 و 280 پسوولەیان 2021 و 336 پسوولەیان لە ساڵى 2022 و 611 پسوولەیان لە ساڵى 2023 و 212 پسوولەیان لە ساڵی 2024، ساختە کردووە و پارەکەیان بۆ بەرژەوەندى خۆیان خەرجکردووە.

ئەوەی پێویستە بیزانیت: ئەو کارمەندانەی شارەوانى تکریت، بەپێى مادەى 340 لە یاساى سزادانى عێراق دەستبەسەرکراون و لێکۆڵینەوەیان لەگەڵ دەکرێت.