ڕوونکردنەوەیەک لە حکومەتەوە لەبارەی مینحە 100 هەزارییەکە

ئاڤا نیوز

ماوەی دوو مانگە بەغدا مینحە 100 هەزارییەکەی خانەنشینانی هەرێمی کوردستانی ڕاگرتووە. هاوکات ماوەی مانگێکشە هەرێمی کوردستان بۆ گەڕانەوەی ئەو مینحەیە نووسراوی بۆ سوودانی کردووە، بەڵام هێشتا واژۆی لەسەر نەکردووە.

وێنە گەورەکە: ئەمڕۆ کاتێک دەست بە دابەشکردنی مووچەی مانگی دووی خانەنشینان  كرا، مینحە 100 هەزارییەکەی لەگەڵ نەبوو، ئەو خانەنشینانە دەگرێتەوە کە مووچەکەیان لە ملیۆنێک کەمترە.

پێدراوە ڕاستەکان: مینحەکە بە ناوی بارگرانیی بژێوی بە بڕیاری سەرۆکوەزیرانی عێراق خەرج دەکرێت و پێویستە ساڵانە سەرۆکوەزیران نوێی بکاتەوە، واتە بە یاسا خەرج نەکراوە و بڕیارە، لە ساڵانی ڕابردوو کوردستانیشی دەگرتەوە.

ئەوەی پێویستە بیزانیت: لە عێراق مانگی یەک مینحەکە ڕاگیرا، بەڵام مانگی دوو سوودانی ئیمزای کرد و دەستی پێکردەوە، قەرەبووی مانگی یەکیشیان وەرگرتەوە.

ئەمەش بزانە: لە هەرێمی کوردستانیش ئەنجوومەنی وەزیرانی کوردستان لە 16ی مانگی دووەوە نووسراوی بۆ سوودانی کردووە ڕەزامەندی لەسەر بدات، بەڵام تاوەکو ئێستا ڕەزامەندی لەسەر نەدراوە.

لێدوانی فەرمی: پێشتر مریەم عوسمان، بەڕێوەبەری گشتیی خانەنشینی هەرێمی کوردستان بە ئاڤای وتبوو، پێشبینی دەکەن بۆ مانگی سێ دەستپێبکاتەوە.

زانیاریی تایبەت: ئەمڕۆ ئاڤا میدیا بەدواداچوونی بۆ بابەتەکە کرد، بۆئەوەی بزانرێت ئەو مینحەیە لەگەڵ مووچەی مانگی سێ دەستپێدەکاتەوە، بەڵام تاوەکو ئێستا هیچ دڵنیاییەک نیە کە لەگەڵ مووچەی مانگی سێ دەستپێدەکاتەوە، بەڵام بەپێی زانیارییەکان ڕاگرتنەکە کاتییە و هەر کاتێک سوودانی ئیمزای بکات، مینحەکەش دەستپێدەکاتەوە و مینحەی مانگەکانی ڕابردووش دەدرێتەوە.