داوای درێژكردنەوەی بڕیاری لێخۆشبوونی %20ـی سزاكانی هاتووچۆ دەكرێت

ئاڤا نیوز

كۆتایی ئەم مانگە بڕیاری لێخۆشبوونی 20%ـی سزاكانی هاتووچۆ لە هەرێمی كوردستان كۆتایی دێت و شۆفیران و بەڕێوەبەرایەتییەكانی هاتووچۆ داوای درێژكردنەوەی وادەی بڕیارەكە دەكەن.

چیرۆكی سەرەكی: ڕۆژی 28ـى 8ـی 2023، دوای ڕەزامەندیی سەرۆكوەزیران مەسرور بارزانی، وەزارەتی ناوخۆی حکومەتی هەرێمی کوردستان بڕیاری لێخۆشبوونی 20%ـی بۆ سەرجەم سزاکانی هاتوچۆ دەرکرد و ئەمەش لەپێناو بەرژەوەندیی هاووڵاتییان و هاندانیان بۆ دانەوەی قەرز و سزاکانیان، ئەم بڕیارە تاوەكوو ئێستا چەند جارێك درێژكراوەتەوە.

قووڵتر: دوایین جار كە بڕیارەكە درێژكرایەوە ڕۆژی 2024-10-03، بوو ئەوكات وەزارەتی ناوخۆ ڕایگەیاند، ڕەزامەندیی سەرۆكوەزیران مەسرور بارزانی وەرگیرا بۆ درێژكردنەوەی داشكاندنی 20% لە سزاكانی هاتووچۆ تاوەكو 2025-03-31.

لێدوانی فەرمی: عەقید هێمن ئەمین، گوتەبێژی پۆلیسی هاتووچۆی هەولێر بە ئاڤا میدیای ڕاگەیاند: درێژكردنەوەی بڕیارەكە لە دەسەڵاتی سەرۆكایەتیی ئەنجوومەنی وەزیرانە و ڕەزامەندیی سەرۆكوەزیرانی پێویستە، داوامان كردووە جارێكی دیكە وادەكە درێژ بكرێتەوە، بەڵام تاوەكو ئێستا هیچ بڕیارێكی تازە نەدراوە.

گوتیشی، بریارەكە لە بەرژەوەندیی شۆفێرانە و خەڵكێكی زۆر سوودمەندبوونە لەو داشكاندنە و خواست و داواكارییەكی زۆریش هەیە بۆ درێژكردنەوەی.