عێراق دەست بە بەرهەمهێنانی چەک و کەرەستەی سەربازی دەکات

ئاڤا نیوز

عێراق دەستی کردووە بە بەرهەمهێنانی چەند جۆرە چەکێکی سووکی سەربازی و لە هەولدایە لە داهاتوو پەرە بەو پیشەسازییە بدات لەڕێگەی وەگرتنی ئەزموون لە وڵاتانی تر.

چیرۆکی سەرەکی: دەستەی پیشەسازی سەربازی، دەستی بە بەرهەمهێنانی چەک و کەرەستەی سەربازی کردووە، کە بە ستاندەردی وڵاتە جیهانییەکان بەرهەمدەهێندرێن.

لێدوانی فەرمی: مستەفا عاتی سەرۆکی دەستەی پیشەسازی سەربازیی عێراق رایگەیاند: دەستەکەیان کار بۆ بەخۆماڵی کردنی پیشەسازی سەربازی دەکات و لە میانی ئاڵوگۆڕی ئەزموون لەگەڵ وڵاتانی دراوسێ کۆمپانیای گەورە پاڵپشتی عێراق دەکەن.

٠ چەندین پڕۆژەی گەورە و گرنگمان ئەنجامداوە، کە ئامانج لێی گەرەنتیکردنی پێداویستی سەربازی و دابینکردنی خواستی ناوخۆیە. بۆیە بەردەوامین لە کارەکانمان بۆ بەخۆماڵیکردنی پیشەسازی سەربازی.

٠ ئەوەی ئێستا لە عێراق بەرهەمدەهێندرێن چەکی سووکن، کە بریتین لە چوار جۆری کلاشینکۆف و چوار جۆری دەمانچە و هاوکات بەرهەمهێنانی کەرەسەتەی سووک و مامناوەندی سەربازی و تۆپ و تەقەمەنی هاوەن.

لە لایەکی دیکەوە: سەرۆکی دەستەی پیشەسازی سەربازی عێراق ئاشکرای کرد، لە بەرهەمهێنانی ئۆتۆمبێلی کارەبایی گەیشتوونەتە قۆناغێکی پێشکەوتوو، دوای گەیشتنی پارچە و یەدەگی پێویست لە پڕۆژە سەربازی و مەدەنییەکانیان بەردەوام دەبن.