یاری نێوان عێراق و کوێت لەکاتی خۆی دەکرێت و دوا ناخرێت

ئاڤا نیوز

سەرەڕای چەندین داواکاری لەلایەن پیاوانی ئایینی و وتاربێژانی مزگەوتەکان بۆ دواخستنی یاریی نێوان عێراق و کوێت کە هاوکاتە لەگەڵ ساڵیادی بریندارکردنی ئیمام عەلی، یارییەکە لە وادەی خۆیدا دەکرێت و دوا ناخرێت.

ئەوەی پێویستە بیزانیت: بڕیارە کاتژمێر 9:15ـی ئێوارەی سبەی پێنجشەممە 20-03-2025، یاریی نێوان عێراق و کوێت لە چوارچێوەی گەڕی حەوتەمی کۆمەڵەی Bی پاڵاوتنەکانی کیشوەری ئاسیا بۆ گەیشتن بە جامی جیهانی 2026 لە بەسرە بەڕێوەبچێت.

ئەوەی لەوبارەیەوە دەگوترێت: بەشێک لە پیاوانیی ئایینی شیعە و وتاربێژانی مزگەوتەکان داوایان کردووە کاتی ئەم یارییە دوابخرێت، چونکە هاوکاتە لەگەڵ یادی برینداربوونی ئیمام عەلی، ئەو یادە ناخۆشە بۆ ئەوان.

لێدوانی فەرمی: لەسەر داواکاری ئەو وتاربێژانە، ئەسعەد عیدانی،  پارێزگاری بەسرە ڕایگەیاند، ناکرێت یاریی هەڵبژاردەی عێراق بەرامبەر کوەیت دوابخرێت، چونکە وادەی یارییەکە پێشوەخت لەلایەن یەکێتیی تۆپی پێی جیهانی (فیفا)وە دیاری کراوە و ناکرێت گۆڕانکاری بەسەردا بکرێت یان دوابخرێت.

لەلایەکی دیکە: عەقیل فرەیجی، سەرۆکی لیژنەی ئەمنی لە ئەنجوومەنی پارێزگای بەسرە، لە کۆنگرەیەکی ڕۆژنامەوانیدا ڕایگەیاند: لەبەر ڕێزگرتن لە ڕۆژانی برینداربوون و شەهیدبوونی ئیمام عەلی، بڕیاردرا لە دوای کۆتاییهاتنی یارییەکەی عێراق و کوەیت، هەر جۆرە ئاهەنگێک قەدەغە بکرێت.

ئەمەش بزانە: عەلی کوڕی ئەبووتاڵیب ڕۆژی 21ـی ڕەمەزانی ساڵی 40ـی کۆچی گیانی لەدەستدا، ئەمەش دوای سێ ڕۆژ لە بریندارکردنی لەسەر دەستی عەبدولڕەحمانی کوڕی مەلجەم لە مزگەوتی کووفە لەکاتی نوێژی بەیانیدا. بەم بۆنەیەشەوە ساڵانە موسڵمانانی شیعە مەزهەب شەوێک پێشتر و ڕۆژانی دواتر یادی ئەو ڕۆژە دەکەنەوە و ماتەم دەگێڕن.