تەندروستی جیهانیی: پێشبینی دەکرێت ئەمساڵ 100 هەزار کەس بەهۆی مەلاریا گیانلەدەستبدەن

 

ئاڤا نیوز

بەپێی ڕاپۆرتێکی ڕێکخراوی تەندروستی جیهانیی دەردەکەوێت، ئەمساڵ زیاتر لە 100 هەزار کەس لە جیهاندا بەهۆی  نەخۆشی مەلاریاوە گیانلەدەستدەدەن.

وێنەگەورەکە: بەهۆی کشانەوە و ڕاگرتنی هاوکارییە داراییەکانی ئەمریکا لە ڕێکخراوی تەندروستی جیهانیی، بەڕێوبەری ئەو ڕێکخراوە هۆشداریدا لە ساڵی 2025 نزیکەی 107 هەزار کەس لە سەرانسەری جیهاندا بەهۆی مەلاریاوە گیانلەدەستدەدەن.

لێدوانی فەرمی: تێدرۆس ئەدهانۆم،  بەڕێوەبەری گشتیی ڕێکخراوی تەندروستی جیهانیی ڕایگەیاند: لە ماوەی دوو دەیەی ڕابردوودا ئەمریکا گەورەترین لایەنی پارەدارکردنی ڕێکخراوی تەندروستی جیهانیی بووە بۆ کۆنتڕۆڵکردنی مەلاریا، ئەگەر ئەمریکا هاوکاری دارایی بۆ ڕێکخراوەکە زیاد نەکات ئەمساڵ 15 ملیۆن حاڵەتی نویێ توشبوون بە مەلاریا تۆمار دەکرێت.

ئەوەی پێویستە بیزانیت: مەلاریا نەخۆشییەکە بەهۆی مشەخۆرەوە دروست دەبێت، مشەخۆرەکە لە ڕێگەی مێشوولە تووشبووەکانەوە بۆ مرۆڤ دەگوازرێتەوە. ئەو کەسانەی نەخۆشی مەلاریایان هەیە بەزۆری هەست بە نەخۆشییەکی زۆر دەکەن لەگەڵ تایەکی بەرز و لەرزینی سارد.

زانیاری زیاتر: لە سەرەتایی دەستبەکاربوونی دۆناڵد ترەمپ، بڕیاری کشانەوەی ئەمریکای لە ڕێکخراوی تەندروستی جیهانیی دا و بەمەش کاریگەری نەرێنی کردە سەر ئەو ڕێکخراوە چونکە لە 18% بودجەی لەلایەن ئەمریکاوە دابین دەکرا.