گۆڤارێکی ئەمریکی: هێزێکی حەشدی شەعبی بەرەو یەمەن جووڵەیان پێدەکرێت

ئاڤا نیوز

بەگوێرەی گۆڤاری "فۆرین پۆلیسی"ـی ئەمریکی، بەشێک لە هێزەکانی حەشدی شەعبی بۆ پاڵپشتی لە حوسییەکان لەعێراقەوە بەرەو یەمەن جووڵەیان پێکراوە.

وێنە گەورەکە: لە ڕاپۆرتەکەدا هاتووە، لە کاتێکدا باڵەکانی ئێران بەناوی میحوەری مقاوەمە، بەتایبەتی هەردوو بزووتنەوەی حەماس و حزبوڵڵا، لە دوای هێرشەکانی ئیسرائیل و کوشتنی سەرکردەکانیان بەشێوەیەکی بەرچاو لەڕووی سەربازییەوە پاشەکشەیان کردووە، تەنیا حوسییەکان تاوەکو ئێستا پێگەی خۆیان پاراستووە.

پلانه‌كه‌: ڕاپۆرتەکە جەختی لەوەکردەوە، دوای ڕووخانی ڕژێمی بەشار ئەسەد لە سووریا، فەرماندە و چەکدارەکانی پێشووی حزبووڵڵا کە لە لوبنان و سووریا جێگیر کرابوون، لەگەڵ بەشێک لە گرووپە چەکدارە شیعەکانی عێراق، گواستراونەتەوە بۆ ناوچەکانی ژێر دەسەڵاتی حوسییەکان لە یەمەن.

ئه‌وه‌ی ئێستا ڕووده‌دات: هەر بەپێی ڕاپۆرتەکە، حوسییەکان نووسینگەیان لە بەغدا و کەرکووک و باشووری عێراق هەیە، هاوکات چەکدارانی ئەو بزووتنەوەیە سەربازگەیەکی حەشدی شەعبی لە شارۆچکەی خالس لە پارێزگای دیالە بۆ مەشق و ڕاهێنان بەکاردەهێنن.

بە تەنیشت ئەم بابەتە: فەرماندەیی ئۆپراسیۆنە هاوبەشەکانی عێراق ڕەتیکردەوە کە گرووپی حوسییەکانی یەمەن سەربازگەیەک لە ناوخۆی عێراق بۆ مەبەستی مەشق و ڕاهێنان بەکار بهێنن.