سەرۆک بارزانی لە نەورۆزی ئامەد: هیوادارین لە زووترین کاتدا ئۆجەلان ئازاد بکرێت

ئاڤا نیوز

 

سەرۆک بارزانی بە بۆنەی جەژنی نەورۆزە پەیامیک ئاراستەی گەلی کورد دەکات و دەشڵێت: هیوادارین لە کاتێکی نزیکدا عەبدوڵڵا ئۆجەلان ئازاد بکرێت.

وێنە گەورەکە: ئەمڕۆ هەینی 21ـی3، گەورەترین ئاهەنگی نەورۆز ئامەدی باکووری کوردستان بە ئامادەبوونی ملیۆنان هاووڵاتی بەڕێودەچێت و پەیامی سەرۆک بارزانی بەبۆنەی جەژنی نەورۆزەوە تێدا دەخوێندرێتەوە لەلایەن سەربەست لەزگین، ئەندامی مەکتەبی سیاسی پارتی دیموکراتی کوردستان.

پەیامی فەرمی: دەقی پەیامی سەرۆک مەسعود بارزانی:

 

-نەورۆز بۆ گەلی کوردستان بەهار و نوێبوونەوە، ڕۆشنایی و ئازادییە.

-نەورۆز واتای ژیانێکی تازە و موژدەی سەرکەوتنی ڕووناکی بەسەر تاریکی و زوڵمدا دەدات.

-بەبۆنەی هاتنەوەی جەژنی نەتەوەیی نەورۆەوە پیرۆزبایی لە خانەوەدای سەربەزری شەهیدان، پێشمەرگە قارەمانەکان، سەرجەم چین و توێژەکانی خەڵکی کوردستان و ڕۆڵەکانی گەلی کورد لە هەر چوارپارچەی کوردستان دەکەم. 

-پیرۆزبایی لە هەموو ئەو نەتەوانە دەکەم کە نەورۆز بەشێکە لە مێژوو و کولتوور و داب و نەریتیان.

-پیرۆزبایی نەورۆز لە ڕەوەندی کوردی و لەو ملیۆنان کوردە دەکەم کە بەهەستێکی بەرزەوە، دوور لە خاک  و نیشتمان جەژنی نەورۆز بە بەرزی ڕادەگرن و بەهاکانی بە هەموو جیهاندا بڵاو دەکەنەوە. 

-پێیان دەڵێین ئێوە هەمیشە لە هزر و ویژدانی ئیمە دان، خۆشی و جەژنەکانتان درێژکراوەی خۆشی و جەژنەکانی ئێمەیە.

-جێگەی شانازییە دەبینن لە نەورۆزدا دەست لەناو دەست ئاڵای ئازادی و شکۆ بەرز دەکەنەوە.

-زۆر خۆشحاڵم کە سبەی لە شاری کۆڵنی ئەڵمانیا ئاهەنگێکی گەورە بۆ نەورۆز ساز دەکرێت و سۆزی خۆتان بۆ وڵاتەکان دووپات دەکەنەوە، ئێوە دەنگ و ڕەنگی گەلەکەتانن و دەستخۆشیتان لێدەکەم.

-لە جەژنی نەتەوەیی نەورۆزدا بە شانازییەوە جەخت لە فەرهەنگی پێکەوەژیان و پەیامی ئاشیخوازانەی گەلی کوردستان دەکەینەوە.

-لەو سۆنگەیەوە پشتیوانی پرۆسەی ئاشتی و چارەسەری لە تورکیا دەکەین.

-هیوادارین لە نزیکترین کاتدا عەبدوڵڵا ئۆجەلان ئازاد بکرێت.

-ئاشتی بە تاکە ڕێگەی ڕاستی و دروستی تێپەڕاندنی کێشەکان دەزانین.

- هیوادارین کۆتایی بە ئێش و ئازارەکانی کورد لە سووریا بێت.

- کورد بە هەڵوێستی هاوبەش و ئاشتیانە لەگەڵ لایەنەکانی دیکەی سووریا بگەنە ئەنجامێک لە خزمەتی هەموو لایەکدا بێت.

-هیوادارم نەورۆزی ئەمساڵ بێتە دەستپیکێک بۆ ئاسودەیی و خۆشی بۆ هەموو خەڵکی کوردستان و ناوچەکە بە گشتی. 

-ئەو نەورۆزە و هەموو جەژنەکانیان لە کامەرانی و بەختەوەری بەڕی بکەن.

- ئومێد دەخوازم گەلانی ناوچەکە لە ژێر ئارامی و سەقامگیریدا، لە کەشێکی ئاشتی و برایەتیدا بژین.