14 پاکستانی لە عێراق دەستگیر دەکرێن

ئاڤا نیوز

 

14 هاووڵاتی پاکستانی کە بەشێوەی قاچاغ هاتبوونە نێو خاکی عێراق، لەلایەن هێزە ئەمنییەکانەوە دەستگیر دەکرێن کە بە نیاز بوون بچنە بەغدای پایتەخت.

 

وێنە گەورەکە: بەگوێرەی ئامارە فەرمییەکان لە عێراق 43 هەزار کرێکاری بیانی هەن کە مۆڵەتی کارکردنیان هەیە، ئەمە جیا لە بوونی هەزارانی دیکە کە بەشێوەی نایاسایی هاتوون و هاتنیشیان بەشێوەی قاچاغ بەردەوامە.

 

ڕاگەیێنراوی فەرمی: شەممە 2025-3-22، فەرماندەیی پۆلیسی دیالە ڕایگەیاند، هێزێکی ئەمنیی هاوبەش دەستیان بەسەر ئۆتۆمبێلێکی بارهەڵگردا گرت کە 14 کەسی بیانی هەڵگرتبوو بەپێچەوانەی یاساکانی نیشتەجێبوونی عێراق.

 

زانیاریی زیاتر: فەرماندەییەکە لە ڕاگەیێندراوەکەدا ئاماژەی بەوەکردووە، ئۆپەراسیۆنەکە لەلایەن یەکە تەکنیکییە تایبەتەکان بە هاوکاریی بەشی کاروباری بازگەکان ئەنجامدراوە، ڕێوشوێنی یاسایی پێویست گیراوەتەبەر، بارهەڵگرەکە گواستراوەتەوە بۆ دەستبەسەرکردن، هەروەها شۆفێرەکە و سەرجەم سەرپێچیکاران دەستگیرکراون.

 

زانیاریی بەدەستهاتوو: بەگوتەی سەرچاوەیەک کە قسەی بۆ میدیای عێراق کردووە، سەرجەم دەستگیرکراوەکان هاووڵاتی پاکستانین و بەشێوەیەکی نایاسایی هاتوونەتە ناو خاکی عێراق.

 

ئەوەی پێویستە بیزانیت: ناوەڕاستی مانگی دووی ئەمساڵ، بەڕێوەبەرایەتیی نشینگە لە وەزارەتی ناوخۆی عێراق دەستگیرکردنی نزیکەی سێ هەزار کرێکاری سەرپێچیکاری بیانی و دیپۆرتکردنەوەیان بۆ دەرەوەی عێراق ڕاگەیاند کە زۆرترینیان هەڵگری ڕەگەزنامەی سووری، بەنگلادیشی و پاکستانی بوون.