زیاتر لە شەش ملیۆن زیارەتکار بەشداریی لە ساڵیادی شەهیدبوونی ئیمام عەلی دەکەن

ئاڤا نیوز

 

بە بەشداریی زیاتر لە شەش ملیۆن زیارەتکار، ڕۆژی شەممە لە پارێزگای نەجەف ساڵیادی شەهیدبوونی ئیمامی عەلی، چوارەم خەلیفەی ئيسلام زیندووکرایەوە و شیوەنی بۆ گێڕدرا.

 

بۆچی گرنگە: ساڵی ڕابردووش بۆ هەمان ڕێوڕەسم چوار ملیۆن و 732 هەزار کەس سەردانی نەجەفیان کرد، زیارەتکارەکان جگە لە ناوخۆ، لە دەیان وڵاتی دیکەی جیهانیش دێنە عێراق و ئەوەش وەک سەرچاوەیەکی گەشتیاریی ئاینیی سوودی بۆ بازاڕی وڵاتەکە دەبێت.

 

ڕاگەیێنراوی فەرمی: عەتەبەی عەلەوی کە دامەزراوەیەکە سەرپەرشتی مەزاری ئیمامی عەلی و ڕێوڕەسمەکانی دەکات بڵاویکردەوە، ئەمساڵ 6 ملیۆن و 391 هەزار زیارەتکار بەشدارییان لە ساڵیادی شەهیدبوونی ئیمامی عەلیدا کرد.

 

زانیاریی زیاتر: ئاماژەی بەوەشکردووە، لەو ماوەیەدا جگە لە خستنەگەڕی تەواوی تواناکان بۆ ئەوەی بتوانن ئەو ڕێوڕەسمە ملیۆنییە بە باشترین شێوە بەڕێوەبەرن، ژەمی خواردنیشیان بەسەر دەیان هەزار ڕۆژوەواندا دابەشکرد.