لە بەغدا دەستبەسەر 183 کیلۆگرام ماددەی هۆشبەردا دەگیرێت

ئاڤا نیوز

بەڕێوەبەرایەتی نەهێشتنی ماددە هۆشبەرەکانی عێراق دەڵێت، لە بەغدا 21 تۆمەتباری ماددەی هۆشبەر دەستگیرکراون و دەستیشیان بەسەر 183 کیلۆگرام ماددەی هۆشبەردا گرتووە.

وێنە گەورەكە: ماوەی چەند ساڵێكە بەكارهێنان و بازرگانیكردن بە ماددە هۆشبەرەكان و كارتێكەرە عەقڵییەكان لە عێراق لە حاڵەتەوە بووەتە دیاردە، بڕێكی زۆری ماددەی هۆشبەر لە ئێران و پێشتریش لەسەردەمی حكومڕانی ئەسەد، لە سووریا دەهێنرێتە ناوخۆی عێراق، ئامارەكان ئاماژە بە هەڵكشانی ترسناكی ڕێژەی بەكارهێنەران و بازرگانانی ماددەی هۆشبەر دەكەن.

ڕاگەیێنراوی فەرمی: بەڕێوەبەرایەتی نەهێشتنی ماددە هۆشبەرەکانی عێراق لە ڕاگەیێنراوێکدا باسی لەوەكردووە، لەسەر بڕیاری دادگا و ڕاسپاردەی فەرماندەی گشتی هێزە چەکدارەکان و دوای چاودێرییکردنیان، ئەندامانی تۆڕێکی ماددەی هۆشبەر لە بەغدا دەستگیرکران کە لە 21 کەس پێکهاتوون، هاوکات 183 کیلۆگرام ماددەی هۆشبەریش دەستیبەسەردا گیراوە.

ئەوەی پێویستە بیزانیت: ساڵی ڕابردوو لە عێراق 14 هەزار کەس بەتۆمەتی بەکارهێنانی ماددەی هۆشبەر دەستگیرکراون، دەستیش بەسەر زیاتر لە شەش تۆن لەو ماددەیە گیراوە.