شاندێکی هەرێمی کوردستان لە لووتکەی وەبەرهێنانی ئەبوزەبی بەشدار دەبێت

ئاڤا نیوز

 

شاندێکی هەرێمی کوردستان بۆ بەشداریکردن لە لووتکەی وەبەرهێنان سەردانی ئیمارات دەکات.

 

وێنە گەورەکە: 14هەمین کۆنفڕانسی لووتکەی وەبەرهێنان لە ئەبوزەبی ئیمارات دەستپێدەکات، ئەم کۆنفڕانسە ساڵانەیە و نزیکەی 170 تاوەکو 200 وڵات و زیاتر لە 10 هەزار سەرمایەدار و وەبەرهێنەری جیهانی تێدا بەشدار دەبن.

 

لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤا میدیای ڕاگەیاند: شاندەکە لە د.محەممەد شوکری، سەرۆکی دەستەی وەبەرهێنان و 10 بۆ 15 سەرمایەدار و وەبەرهێنەری ناسراو پێکهاتووە، بەشێوەیەکی فەرمی بۆ کۆنگرەکە بانگێشتکراون.

 

زانیاریی زیاتر: کۆنگرەی لووتکەی وەبەرهێنان 7 تاوەکو 9ی نیسان بەردەوام دەبێت، هەروەها هەرێمی کوردستان دوو ساڵە لە کۆنگرەکەدا هاوشانی وڵاتانی سەربەخۆ بەشدار دەبێت.

 

زانیاریی بەدەستهاتوو: شاندەکەی هەرێمی کوردستان لە پەراوێزی کۆنگرەکەدا چەندین دیداریان لەگەڵ سەرمایەدار و وەبەرهێنەرانی جیهان دەبێت، بۆ ئەوەی سەرمایەکانیان لە هەرێم بخەنەگەڕ و بەتایبەت لەو بوارانەی بۆ بوژانەوەی ژێرخانی ئابووری پێویستمانە.

 

بۆچی گرنگە: سەرەڕای دیوە ئابوورییەکەی، ئەم کۆنگرەیە لایەنی سیاسیی و دیبلۆماسی گرنگی هەیە، ئەمەش کاریگەریی باشی لەسەر پێگەی هەرێمی کوردستان لەو ڕووەوە دەبێت.