ناکۆکییەکانی ناو بزووتنەوەی گۆڕان دەگاتە دادگای فیدڕاڵی

ئاڤا نیوز

ئەمڕۆ دادگای فیدڕاڵی لەسەر سکاڵایەک کۆدەبێتەوە کە دژی دانا ئەحمەد مەجید، ڕێکخەری گشتی بزووتنەوەی گۆڕان تۆمارکراوە و تێیدا داواکراوە چیتر کۆمیسیۆنی هەڵبژاردنەکانی عێراق مامەڵە لەگەڵ سەرکردایەتی ئێستای بزووتنەوەکە نەکات، چونکە دەستلەکارکێشاوەن و مامەڵەکردن لەگەڵیان نادروستە.

وێنە گەورەکە: ئێستا بزووتنەوەی گۆڕان بەسەر دوو ئاڕاستەی جیاوازدا دابەش بووە، گۆڕانی "گەڕەكی كوردسات" دانا ئەحمەد مەجید ڕێکخەرییەتی و "گۆڕانی گردی زەرگەتە"ش ڕێنمایی لە چیا نەوشیروان مستەفاوە وەردەگرێت، بڕیاریش بوو پێش 11ـی ئەم مانگە هەردوو ئاڕاستەکە ڕێکبکەون و کۆنگرەی نوێی ئەو بزووتنەوەیە ببەستن.

هۆکارە زانراوەکان: بەگوێرەی خشتەی کۆبوونەوەکانی دادگای فیدڕاڵی، ئەمڕۆ دادگاکە لەسەر سکاڵایەکی هۆشیار عومەر، بەرپرسی ژووری پەیوەندییە دیبلۆماسییەکان و ئەندامی جڤاتی نیشتیمانیی گۆڕان کۆدەبێتەوە کە دژی سەرۆکی کۆمیسیۆنی هەڵبژاردنەکانی عێراق و سەرۆکی ئەنجوومەنی باڵای دادوەریی هەرێمی کوردستان تۆماریکردووە.

زانیاریی زیاتر: هۆشیار عومەر لە سکاڵاکەیدا سێ داواکاریی ئاڕاستەی دادگای فیدڕاڵی کردووە ئەوانیش بریتین لە:

یەکەم: بڕیاری ئەنجوومەنی کۆمیسیاران لە 11ـی ئەیلولی 2024 بە نادروست لە قەڵەم بدرێت کە مۆڵەتی داوە بە سەرکردایەتی ئێستای گۆڕان بۆ ئەوەی دوای دەستلەکارکێشانەوەشیان، شەش مانگ لە کارەکانیان بەردەوام بن (واتە تا 11ـی ئازاری 2025).

دووەم: بڕیاری دادگای تاوانەکانی سلێمانی لە 2024-07-24، بە نادروست لە قەڵەم بدرێت کە بەهۆیەوە هەموو ڕێکارە دادوەرییەکان بەشێوەی کۆتایی دژی (تۆمەتبار دانا ئەحمەد مەجید شاسوار) ڕاگیراون.

سێیەم: فەرمانێکی سالاری دەربکرێت و هەموو ڕێکارەکانی فەرمانگەی کاروباری حیزبەکان لە کۆمیسیۆنی باڵای هەڵبژاردنەکان ڕابگیرێت کە دوای دەستلەکارکێشانەوەی سەرکردایەتی حیزبەکە گرتوونیەتەبەر.