وەزارەتی ئەوقاف سەبارەت بە پەیامی كەسایەتییە ئاینییەكان بڕیارێك دەدات

ئاڤا نیوز

د. پشتیوان سادق، وەزیری ئەوقافی هەرێمی كوردستان لەگەڵ لیژنەی باڵای بۆردی ئایینی كۆدەبێتەوە و بڕیارێك سەبارەت بە پەیامی كەسایەتی و مامۆستایانی ئایینی دەدات.

 
ڕاگەیێنراوی فەرمی: بەپێی ڕاگەیێنراوی وەزارەتی ئەوقاف و كاروباری ئایینی حكومەتی هەرێمی كوردستان، لە کۆبوونەوەکەدا تیشک خرایە سەر داکۆکیکردن لەسەر پاراستنی ئاشتی کۆمەڵایەتی و پابەندبوون بە كلتووری فرەیی و قبوڵکردنی یەکتری لەنێوان هزرمەندان و ئاراستە جیاوازەکانی ئایینی ئیسلام، کە پێویستە لە چوارچێوەی دەربڕینی ئایینیدا، ڕێز لە یەکتری بگرن.

زانیاریی زیاتر: لە كۆبوونەوەكەدا پێداگری لە جیاكردنەوەی ڕای كەسی كرایەوە لەوەی ناكرێت قسەی تایبەتی كەسایەتییەكی ئایینی گشتاندنی بۆ بكرێت.

قووڵتر: لیژنەی باڵای بۆردی ئایینی بڕیاری دا کە بە پێی یاسا و ڕێنماییە بەرکارەکان و هەماهەنگی لەگەڵ دەزگا پەیوەندیدارەکانی دیکە، وەزارەتی ئەوقاف و کاروباری ئایینی، دەستکراوە دەبێت لە بەدواداچوون و لێپرسینەوە لە هەرکەسێکی سەرپێچیکار کە لە هەر ئاست و پلەیەک دابێت، چونکە ئاسایشی فیکری بەشێکە لە ئاسایشی هەرێمی کوردستان و بەرژەوەندی و دەستکەوتە نیشتمانییەکانی گەلی کوردستانیش لە سەرووی هەموو ململانێیەکەوەن .