وەزارەتی رۆشنبیری ڕووماڵكردنی تاوانی كوشتن لە میدیاكان قەدەغە دەكات

ئاڤا نیوز

وەزارەتی ڕۆشنبیری سەرجەم دەزگا میدیاییەكان ئاگاداردەكاتەوە كە خۆیان بەدووربگرن لە بڵاوكردنەوە و ڕووماڵی هەواڵی تاوان، بەوپێیەی كاریگەری نەرێنی دەكاتە سەر دەروونی هاووڵاتیان، هەر میدیایێك سەرپێچی بكات، ڕێكاری یاسایی بەرامبەر دەگیرێتەبەر.

وێنە گەورەكە: دوای ئەوەی فەرمانگەی داواكاری گشتیی سلێمانی بەنووسراوی فەرمی لەڕێگەی بەڕێوەبەرایەتیی گشتیی ڕۆشنبیریی سلێمانی داوای پابەندكردنی سەرجەم كەناڵەكانی ڕاگەیاندن (میدیای بینراو و بیستراوەكان)ـی كرد كە خۆیان بەدووربگرن لە ڕووماڵكردنی تاوانی كوشتن و وەرگرتنی لێدوان لە كەسوكاری كوژراو، بەو پێیەی كاریگەری نەرێنی دەبێت لەسەر ڕەوتی لێكۆڵینەوەكان و ئاراستەكردنی ڕای گشتی و نەمانی متمانە بە دادگا و دامودەزگا حكومییەكان.

نووسراوی فەرمی: بەپێی نووسراوی فەرمیی بەڕێوەبەرایەتیی گشتیی ڕاگەیاندن و چاپ و بڵاوكردنەوەی سەر بە وەزارەتی ڕۆشنبیری و لاوانی حكومەتی هەرێمی كوردستان كە وێنەیەكی دەست ئاڤا میدیا كەوتووە، تێیدا ئاماژە بەگرتنەبەری ڕێكاری یاسایی دەكات بەرامبەر ڕووماڵی ناپیشەییانەی هەواڵی تاوان و چۆنیەتی ئەنجامدانی لەلایەن ئەنجامدەرانی.

هۆكارە زانراوەكان: كاتێک تاوانێك ڕوودەدات، ئەوكاتەی دادگا و دەزگا ئەمنییەكان سەرقاڵی كۆكردنەوەی زانیاری و لێكۆڵینەوەن، كەچی بەشێك لە دەزگاكانی ڕاگەیاندن بەبێ ڕەچاوكردنی ئیتیكی كاری ڕۆژنامەگەری و دۆخی دەروونی هاووڵاتیان و كەسوكاری تاوانلێكراو و تۆمەتبار، پێش دادگا و هێزە ئەمنییەكان دەكەون و زانیاری نادروست و نایاسایی بڵاودەكەنەوە كە دەبێتە هۆی ئاراستەكردنی ڕای گشتی و نەمانی متمانە بە دادگا و دامودەزگا حكومییەكان.