شاخەوان عەبدوڵڵا: ڕێگە بە تێپەڕاندنی هیچ پڕۆژەیاسایەكی دیكە نادەین

ئاڤا نیوز

د. شاخەوان عەبدوڵڵا ڕایدەگەیەنێت، سەرجەم فراكسیۆنە كوردستانییەكانی نێو پەرلەمانی عێراق كۆكن لەسەر ئەوەی لە دانیشتنەكانی پەرلەمانی عێراق ڕێگە بە تێپەڕاندنی هیچ پڕۆژەیاسایەك نادەن تا پڕۆژەیاسای بەپارێزگابوونی هەڵەبجە دەنگی لەسەر نەدرێت، ڕێگەش نادەن هیچ پڕۆژەیاسایێكی دیكەی لەگەڵدا دابندرێت.

لێدوانی فەرمی: لە لێدوانێكی بۆ دەزگاكانی ڕاگەیاندن، د. شاخەوان عەبدوڵڵا، جێگری سەرۆكی پەرلەمانی عێراق ڕایگەیاند، سەرجەم فراكسیۆنە كوردستانییەكان بەبێ جیاوازی پرۆژەی بەپارێزگابوونی هەڵەبجەیان گەیاندووەتە قۆناغێكی زۆرباش و "ئێمەش وەك دەستەی سەرۆكایەتی پەرلەمان خستوومانەتە نێو كارنامەی دانیشتنەكانی پەرلەمان".

چی ڕوویدا: بەشێك لە هێز و لایەنە سیاسییەكانی نێو پەرلەمانی عێراق بەبیانووی هەبوونی پرۆژەیاسای حەشد لەنێو كارنامەی ئەمڕۆی پەرلەمان، بایكۆتی دانیشتنەكەیان كرد، جێگری سەرۆكی پەرلەمانی عێراقیش دەڵێت، ئەو بیانووەش دەبڕین و لەدانیشتنی داهاتوو بابەتی هەڵەبجە بە تەنها لە بەرنامەی كار دادەنرێت و هیچ پڕۆژەیەكی دیكەی لەگەڵدا دانانرێت.

لەلایەکی دیکەوە: سۆران عومەر، سەرۆكی فراكسیۆنی كۆمەڵی دادگەری لە پەرلەمانی عێراق ڕایگەیاند، "سەرجەم فراكسیۆنە كوردستانییەكان لە كۆبوونەوەی ئەمڕۆ بڕیارمانداوە كە ئەگەر کۆبوونەوەی ئەمشەو بۆ دەنگدان لەسەر بەپارێزگابوونی هەڵەبجە نەکرێت، بەشداری هیچ کۆبوونەوەیەکی دیکەی پەرلەمانی عێراق ناکەین."