تا ئێستا 26 گەڕەكی هەولێر بەپڕۆژەی ڕووناكی ڕووناكبوونەتەوە

ئاڤا نیوز

دوای ئەوەی پڕۆژەی ڕووناکی گەیشتە شەش گەڕەکی دیکەی هەولێر، ئێستا ژمارەکە زیادی کردووە و 26 گەڕەکی ئەو شارە بە کارەبای 24 کاتژمێری ڕووناکبوونەتەوە و ئاڤا زانیویەتی بەشێک لە گەڕەکەکانی دیکەی سنووری شەقامی بازنەیی 60 مەتری لە هەولێر، وێستگەی داهاتووی گەیاندنی پڕۆژەی ڕووناکی دەبن.

وێنە گەورەکە: دوێنی هەینی کارەبای نیشتمانیی 24 کاتژمێری بۆ گەڕەکەکانی (تەیراوە، مستەوفی، کورانی ، عەنکاوە، سەڵاحەددین و منارە) دابین کرا، بەمەش کۆی گەڕەکە سوودمەندبووەکانی شاری هەولێر لە پڕۆژەی ڕووناکی، گەیشتە 26 گەڕەک.

 

زانیاریی بەدەستهاتوو: بەر لەو شەش گەڕەکە، گەڕەکەکانی (شادی، بەهاری نوێ، نازناز، بەختیاری، سەربەستی، کوران، کوردستان، ماجیداوە، ڕزگاری، بەهار، کرێکاران، ئازادی، ڕاستی، نیشتمان، ڕاپەڕین، نەورۆز، ماردین، زانیاری، تەعجیل، عارەبان و منارە) لە سنووری هەولێر لە پڕۆژەی ڕووناکی سوودمەندبوون، بەمەش تا ئێستا 26 گەڕەکی شارەکە سوودمەند بوونە و بەپێی زانیارییەکان بەشێکی دیکەی گەڕەکەکانی بازنەی شەقامی 60مەتری، وێستگەی داهاتووی گەیاندنی خزمەتگوزارییەکە دەبن.

 

زانیاریی زیاتر: تەنها لە سنووری هەولێر، 346 هەزار هاووڵاتی لە خزمەتگوزاریی پڕۆژەی ڕووناکی سوودمەند بوونە.

 

ئەوەی پێویستە بیزانیت: پرۆژەی ڕووناکی بەردەوامە لە فراوانبوون و تا ئێستا لەسەرانسەری هەرێمی کوردستان 415 هەزار هاووڵاتی کارەبای 24 کاتژمێرییان بۆ دابین کراوە و نزیکەی 600 مۆلیدەی ئەهلی لە 35 گەڕەکی جیاواز لە سەرانسەری هەرێمی کوردستان، وەستێنراون.