سێ چەکداری داعش لە ئەنبار دەکوژرێن

ئاڤا نیوز

هەواڵگریی سەربازیی عێراق کوژرانی سێ چەکداری ڕێکخراوی داعش لە هێرشێکی ئاسمانی لە ڕێگەی فڕۆکەی جەنگیی F-16ـەوە لە بیابانەکانی ئەنبار ڕادەگەیێنێت.

 

وێنە گەورەکە: لە ساڵی 2017ـەوە شکستی داعشی لە عێراق ڕاگەیێنراوە، بەڵام شانە نوستووەکانی ئەو ڕێکخراوە لە پارێزگاکانی عێراق چالاکن و ناوە ناوە هێزە ئەمنییەکان دەکەنە ئامانج و لە بەرامبەریشدا ئۆپەراسیۆنە ئەمنییەکان بۆ دەستگیرکردن و ڕاوەدوونیان لەلایەن هێزەکانی هاوپەیمانان و هێزەکانی پێشمەرگە و هێزە عێراقییەکان بەردەوامە.

 

لێدوانی فەرمی: عەقید ئوسامە سەهلانی، بەڕێوەبەری ڕاگەیاندن و پەیوەندییە گشتییەکان لە بەڕێوەبەرایەتی هەواڵگری سەربازی لە وەزارەتی بەرگری ڕایگەیاند، ئۆپەراسیۆنەکە لەسەر بنەمای هەواڵگریی "ورد"ـی بەڕێوەبەرایەتیی هەواڵگری سەربازییەوە بووە، کە وایکرد هێرشەکە شوێنەکە بەوپەڕی وردییەوە بکرێتە ئامانج.

 

لەلایەکی دیکەوە: شەوی ڕابردوو فەرماندەیی ئۆپەراسیۆنە هاوبەشەکانی عێراق ڕایگەیاند: بە هەماهەنگی و هاوکاری لەگەڵ بەڕێوەبەرایەتی هەواڵگری سەربازی، توانرا حەشارگەیەکی تیرۆریستان لە بیابانی ئەنبار، لە چوارچێوەی کەرتی لیوای هەشت، فیرقەی حەوت، لە ژێر فەرماندەیی ئۆپەراسیۆنەکانی جەزیرە بکرێتە ئامانج.