بەهۆی هێرشکردنە سەر مەراسیمێک لە کەرکووک لێکۆلینەوە لەگەڵ هێزێکی حەشدی شەعبی دەکرێت

ئاڤا نیوز

 

بەهۆی "ئاژاوەگێڕی و هێرشکردنە سەر مەراسیمێک" مامەڵەکردن لەگەڵ لیوای 63ـی حەشدی شەعبی لە کەرکووک ڕادەگیرێت و داوای پێکهێنانی لیژنەیەکی لێکۆڵینەوە دەکرێت.

 

چیرۆکی سەرەکی: ساڵانە لە دوایین هەینی مانگی ڕەمەزان یادی ڕۆژی جیهانیی "قودس" دەکرێتەوە، لە گەڕەکی تسعینی شاری کەرکووکیش ئەم بۆنەیە بەرز ڕاگیرا، بەڵام هێزێکی سەر بە لیوای 63ی حەشدی شەعبی هەڵیانکوتایە سەر ئاهەنگەکە و دەستیان بە تەقەکردن کرد.

 

نووسراوی فەرمی: بەگوێرەی نووسراوێکی فەرماندەیی میحوەری باکوور و ڕۆژهەڵاتی دیجلە کە واژۆی حەمید ئیبراهیم عەبدولڕەزا، فەرماندەی میحوەرەکەی لەسەرە، داوا دەکات مامەڵەکردن لەگەڵ لیوای 63ـی حەشدی شەعبی ڕابگیرێت، تا ئەوکاتەی لێکۆڵینەوە لەسەر ئەو ئاژاوەگێڕییە دەکرێت کە لە شوێنی کۆبوونەوەی ڕۆژی قودس ڕوویدا. 

 

کاریگەریی و لێکەوتەکان: فەرماندەکە داوای پێکهێنانی لیژنەیەکی لێکۆڵینەوە بە سەرۆکایەتیی بەرپرسی ئۆپەراسیۆنەکانی فەرماندەییەکەیان و ئەندامێتی ئاسایش و هەواڵگریی دەکات بۆ ناسینی بەرپرسی ئەو گرووپەی هەڵیانکوتایە سەر گردبوونەوەکە و تەقەیان کردووە.

 

ئەوەی پێویستە بیزانیت: بەشی زۆری پێکهاتەی لیوای 63ـی حەشدی شەعبی، لە نەتەوەی تورکمانن و پێشتر لیوایەکی تایبەت بەخۆیان هەبوو، حاجی ئەحمەد ئەسعەد جابرلی، بەرپرسی ئێستای لیوای 63ـی حەشدی شەعبییە.

 

ئەمەش بزانە: یادی ڕۆژی جیهانیی قودس، چالاکییەکی ساڵانەیە کە لە دوایین ھەینیی مانگی ڕەمەزان ڕێکدەخرێت، مەبەست لەو چالاکییە پشتگیریکردنە لە خەڵکی فەلەستین و دژایەتیکردنی حکوومەتی ئیسرائیلە. یادەکەش لە دوای شۆڕشی ئیسلامیی ئێران  کە لە ساڵی 1979 کرا، تاکو ئێستا بەردەوام ڕێکدەخرێت.