لویس ساکۆ داوای دیالۆگێکی نیشتمانی بۆ ڕزگارکردنی عێراق دەکات

 

ئاڤا نیوز

پاتریارکی کلدانەکانی عێراق و جیهان، پێشنیازی بانگەوازی ڕێکخستنی دیالۆگێکی نیشتمانی بە بەشداری سەرجەم لایەنە عێراقییەکان دەکات، بە ئامانجی چارەسەرکردنی قەیرانە کەڵەکەبووەکان و بوونیادنانی دەوڵەتێکی بەهێز و سەقامگیر.

چیرۆکی سەرەکی: کاردیناڵ لویس ڕافایل ساکۆ، پاتریارکی کلدانەکانی عێراق و جیهان بەبۆنەی جەژنی ڕەمەزانەوە پەیامێکی پیرۆزبایی بڵاوکردەوە، تێیدا پیرۆزبایی لە سەرجەم موسڵمانان دەکات.

پەیامی فەرمی:

٠ عێراق پێویستی بە قۆناغێکی نوێی بیرکردنەوە و پلاندانان هەیە لەنێو نیگەرانییەکانی دەوروبەری وڵاتەکەدا. ئەوەی لە ماوەی 22 ساڵدا لە تایفەگەری، گوتاری ڕق و کینە، ململانێ و مافیای گەندەڵیدا ئەزموونمان کردووە.

٠ پێشنیازی ڕێکخستنی دیالۆگی نیشتمانیی ڕاستگۆیانە و بوێرانە لە نێوان حکومەتی ئێستا و لایەنە سیاسییەکان و نوخبە ڕۆشنبیری و نەتەوەییەکان دەکەم، بۆ گەیشتن بە پەیڕەوکردنی بەرنامەیەکی نیشتمانی کە عێراق لە سەرووی هەموو شتێکەوە بێت و دەوڵەتێکی بەهێز و سەقامگیر بوونیاد بنرێت و چەک لە دەستی خۆی سنووردار بکات و سەرچاوەکانی عێراق بکاتە خزمەتگوزاری بۆ هاووڵاتیان نەک سەکۆیەک بۆ بەرژەوەندییە ناوخۆیی و دەرەکییەکان.

٠ چاکسازی پێویستی بە پلانێک هەیە بۆ پتەوکردنی چەمکی هاووڵاتیبوون و دەوڵەتێکی مەدەنی خاوەن سەروەری و بەهێزکردنی پێکەوەژیانی نەتەوەیی و ڕۆحی خۆشەویستی و برایەتی و هاوکاری نێوان هەموو هاووڵاتیان لەسەر بنەمای ناسنامەی عێراقی و بەدیهێنانی سەقامگیری و پێشکەوتن و خۆشگوزەرانی زیاتر.