ڕوونکردنەوەیەک لەبارەی پەیوەندی سەرۆکوەزیران لە دیارکردنی یەکەم ڕۆژی جەژن

ئاڤا نیوز

 

وتەبێژی حکومەتی عێراق ڕەتیدەکاتەوە سەرۆکوەزیران دەستی لە دیاریکردنی ڕۆژانی جەژنی ڕەمەزاندا هەبووبێت و نیگەرانی خۆشی دەردەبڕێت لەوەی هەندێک لە سیاسەتمەداران کار بۆ ڕاکێشانی دامەزراوە ئاینییەکان بۆ ناو گۆڕەپانی ململانێ لەسەر هەژموون و پۆستەکان دەکەن.

ئەوەی پێویستە بیزانیت: ڕۆژی شەممە بەشێکی زۆری وڵاتانی عەرەبی ڕۆژی یەکشەممەیان وەک یەکەم ڕۆژی جەژنی ڕەمەزان ڕاگەیاند، بەڵام لە عێراق بۆچوونەکان لەوبارەیەوە زۆر لە یەکتر جیاوازبوون، بە جۆرێک ئەنجوومەنی باڵای فەتوای عێراق و دەستەی زانایانی موسڵمانان یەکشەممەیان کردە جەژن، بەڵام دیوانی وەقفی سوننی و کۆمەڵەی فقهی عێراق گوتیان دووشەممە جەژنە، ئەمەش گومانی لای عێراقییەکان لە دیاریکردنی ڕۆژەکە دروستکرد.

 

لێدوانی فەرمی: باسم عەوادی، وتەبێژی حکومەتی عێراق بە ئاژانسی فەرمی وڵاتەکەی ڕاگەیاند: باسکردن لەسەر دەستوەردانی حکومەت یان محەممەد شیاع سوودانی، سەرۆکوەزیرانی عێراق لە دیاریکردنی بینینی مانگ و دیاریکردنی وادەی جەژن، ناڕاستەو هیچ بنەمایەکی نییە".

 

- سەرۆکوەزیران باوەڕی هەیە و کار بۆ ئەو دەکات ئەو مافە بە دامەزراوە ئایینییەکان بدرێت لەو بوارانەی کە تایبەتە بەخۆیان و خۆشی لەو بابەتانە بەدوور دەخات.

- دامەزراوە ئاینییەکان و مەرجەعە ئاینی و مقهییەکان و دامەزراوە شەرعییەکان ئەوان لایەنی بەرپرسیارن لە دیارکردنی وادە و پرسە شەرعییەکان.