سەرکردە شیعەکان بە ئاشکرا باس لە مەترسی دابەشکردنی عێراق دەکەن

ئاڤا نیوز

ماوەیەکە بەشێک لەسەرکردە شیعەکانی عێراق باس لە مەترسی دابەشکردنی هەندێک لە وڵاتانی ناوچەی ڕۆژهەڵاتی ناوەڕاست، بەتایبەتی عێراق و سووریا دەکەن، لە گوتاری ئەمڕۆی جەژنی ڕەمەزانیش هەردوو سەرکردەی دیاری شیعە قەیس خەزعەلی و عەممار حەکیم بەڕوونی باسی ئەو مەترسییەیان کرد.

چیرۆکی سەرەکی: وەک نەریتێک سەر لەبەیانی یەکەم ڕۆژی جەژن کە مەرجەعی باڵا و حەوزەی ئیسلامی شیعە دیاری دەکات، سەرکردەکانی بەشێک لە حیزبە شیعە مەزهەبیەکان گوتاری ڕۆژی جەژن لە حوسەینییەکانەوە پێشکەشی لایەنگران و هەوادارانیان دەکەن.

قەیس خەزعەلی لەچی دەترسێت؟

قەیس خەزعەلی، ئەمینداری گشتیی عەسائیبی ئەهلی حەق ئاشکرایکرد، ئیسرائیل پڕۆژەی هەیە بۆ دابەشکردنی عێراق و سووریا لەسەر بنەمای نەتەوەیی، ئەوەش هەڕەشەیەکی ڕاستەوخۆ و مەترسیدار بۆ سەر ئاسایشی نەتەوەیی عێراق دروست دەکات. 

ئەوەی ئێستا ڕوودەدات: خەزعەلی جەختی لەوەکردەوە، ئێستا ئیسرائیل بەشێکی لەناوچەکانی باشووری دیمەشق داگیرکردووە و چەند کێلۆمەترێکی ماوە بگاتە ڕووباری فورات و بنکەی سەربازی تەنەفیش کە دەکەوێتە نێوان سووریا و ئوردن و عێراق هەر بۆ ئەو مەبەستە دروستکراوە.

خەونی ئیسرائیل لەدیدی خەزعەلییەوە:

ئەمینداری گشتی عەسائیبی ئەهلی حەق ئاماژەی بە خەونی ئیسرائیل کرد بۆ گەیشتن بەڕووباری فورات بەمەبەستی دامەزراندنی دوو کیانی سەربەخۆ لەهەردوو کوردستانی عێراق و سووریا و گۆڕینی نەخشەی بەشێک لەوڵاتانی ناوچەی ڕۆژهەڵاتی ناوەڕاست لەسەر بنەمای نەتەوەیی و مەزهەبی.

سەرۆکی ڕەوتی حیکمە و هەمان بۆچوون:

عەممار حەکیم، سەرۆکی ڕەوتی حیکمە لە بەشێکی گوتارەکەی بەبۆنەی جەژنی ڕەمەزانەوە، نیگەرانی خۆی بۆ پەرەسەندنی گرژی و نائارامی لە زۆربەی وڵاتانی ڕۆژهەڵاتی ناوەڕاست و پەرەسەندنی گرژییەکانی نێوان زلهێزە ناوچەیی و نێودەوڵەتییەکان کردەوە  و گوتی ئەم گرژییانە دەرئەنجامی ترسناکی دەبێت بۆ ناوچەکە ئەگەر بە حیکمەت و تێڕوانین چارەسەر نەکرێن.

- حەکیم داوای کاریگەری وڵاتانی عەرەبی کرد بۆ گەڕاندنەوەی سووریا بۆ ناو ژینگە عەرەبیەکەی و دەستپێکردنی هەوڵەکان بۆ ئاوەدانکردنەوەی ئەو وڵاتە، هاوکات داوای هاوکاری لە دەسەڵاتی کاتی سووریا بۆ بەرەنگاربوونەوەی تیرۆر، توندڕەوی و ماددەی هۆشبەر کرد.

حەشدی شەعبی بۆچی؟

سەرچاوەیەکی ئەمنی لە پارێزگای ئەنبار ئاشکرایکرد، هێزەکانی حەشدی شەعبی ڕێوشوێنی ئەمنی توندیان لە بیابانەکانی ڕۆژئاوای ئەنبار گرتووەتەبەر و هێزێکی زۆریان بەدرێژایی سنووری سووریا جێگیرکردووە و تاوەکو ئێستا هۆکارەکەی ناڕوونە.

لەلایەکی دیکەوە: هەر بەپێی ئەو سەرچاوەیە لەئێوارەی ڕۆژی یەکشەممەوە 30-3-2025، هێزەکانی حەشدی شەعبی چەندین خاڵی پشکنینی ئەمنی گەڕۆکیان لەو ناوچانە داناوە.