پاسەوانی سنووری عێراق دەستبەسەر 30 هەزار حەبی کەپتاگۆندا دەگرێت

ئاڤا نیوز

وەزارەتی ناوخۆی عێراق ڕایگەیاند، هەوڵێکی بەقاچاخبردنی 30 هەزار حەبی کەپتاگۆنیان لە سووریاوە و لە ڕێگەی ڕوباری فورات بەرەو عێراق شکست پێهێناوە، بەجۆرێک ماددە هۆشبەرەکان بەشێوەکی توندوتۆڵ پێچراونەتەوە بەئاودا دراون، بازرگانانی ماددە هۆشبەرەکانیش ویستوویانە لە دیوی عێراقەوە ماددەکان هەڵبگرنەوە.

ئەوەی پێویستە بیزانیت: ساڵی ڕابردوو لە عێراق 14 هەزار کەس بەتۆمەتی بەکارهێنانی ماددەی هۆشبەر دەستگیرکراون، دەستیش بەسەر زیاتر لە شەش تۆن لەو ماددەیەدا گیراوە.

ڕاگەیێنراو فەرمی: عەمید میقداد میریی، وتەبێژی وەزارەتی ناوخۆی عێراق ڕایگەیاند: هێزەکانی پاسەوانی سنوور لە ڕوباری فورات بەرەو عێراق و لە ناوچەی باهۆز، هەوڵێکی بەقاچاخبردنی 30 هەزار حەبی کەپتاگۆنیان شکست پێهێنا.

- هەوڵەکە لەڕێگەی کامێرای گەرمبینەوە ئاشکرابووە، بەجۆرێک ماددە هۆشبەرەکە لەناو دەبەی پلاستیکی و نایلۆن و قەسەڵدا بەتوندی پێچراوەتەوە و شاردراوەتەوە.

- ڕێکاری یاسایی گیراوەتەبەر بۆ لێکۆڵینەوەی زیاتریش ماددەکان ڕادەستی لایەنی پەیوەندیدار کراون.