لە پارێزگایەکی عێراق لە ئاهەنگێکی بووک گواستنەوەدا پێنج کەس دەکوژرێن

ئاڤا نیوز

لە ئاهەنگێکی بووک گواستنەوەدا لە باشووری عێراق و لەسەر کێشەیەکی کۆن، شەڕ لەنێوان چەند ئامۆزایەکدا دروستدەبێت و چەکی تێدا بەکاردەهێنرێت، لە ئەنجامیشدا پێنج کەس کوژراون.

چیرۆکی سەرەکی: کێشە کۆمەڵایەتییەکان لەنێوان عەشیرەت و هۆزەکان لە پارێزگاکانی باشوور و ناوەڕاستی عێراق، بە یەکێک لە ئاستەنگە ئەمنییە هەرە دیارەکان دادەنرێت کە زۆرێکیان لەسەر کێشەی زەوی و زار و پشکی ئاوە بۆ زەوییە کشتوکاڵییەکان، لە دەرئەنجامیشدا زۆرکات قوربانییان لێدەکەوێتەوە.

ڕاگەیێنراوی فەرمی: فەرماندەیی پۆلیسی پارێزگای دیوانییە ڕووداوەکەی پشتڕاستکردەوە و ڕایگەیاند، لە ناوچەی هەرمی سەر بە قەزای شنافیە و لە دانیشتنێکدا، شەڕ لەنێوان چەند کەسێکدا دروستبووە کە ئامۆزای یەکترن و تیایدا چەک بەکارهێنراوە، لە ئەنجامیشدا کوژراو و برینداریی لێکەوتووەتەوە.

زانیاریی بەدەستهاتوو: ڕووداوەکە لەسەر قەرز بووە و لە ئاهەنگێکی بووک گواستنەوەدا ئامۆزاکان بەشەڕ هاتوون، لە ئەنجامیشدا پێنج کەس کوژران و ژمارەیەکی دیکەش برینداربوون، پۆلیسی پارێزگاکەش دەڵێت، دەستبەسەر ئەو چەکانەدا گیراوە کە لە شەڕەکەدا بەکارهاتوون و لێکۆڵینەوەش لە ڕووداوەکە دەستیپێکردووە.

لەلایەکی دیکەوە: شەوی ڕابردووش لە پارێزگای میسان و بەهۆی کێشەیەکی دیکەی کۆمەڵایەتییەوە، سەرۆک هۆزێک و هاوەڵەکەی کوژران.