لە بەسڕە هەڵمەتێکی "تووند" دژی ئەوانە ئەنجام دەدرێت کە گێچەڵ بە کچان و ئافرەتان دەکەن

ئاڤا نیوز

دوای بڵاوبوونەوەی گرتەیەکی ڤیدیۆیی گێچەڵپێکردن لە بەسڕە، پۆلیسی پارێزگاکە بڕیاریدا هەڵمەتێکی "تووند" دژی هەموو ئەو کەسانە دەستپێبکات کە گێچەڵ بە کچان و ئافرەتان دەکەن.

چیرۆکی سەرەکی: لە دوێنێوە لە تۆڕە کۆمەڵایەتییەکان گرتەیەکی ڤیدیۆیی لە شارێکی یاری بەسڕە لە باشووری عێراق بڵاوبووەتەوە و تێیدا دەردەکەوێت چەند کەسێک بەشەڕ هاتوون، دەوترێت هۆکارەکەی گێچەڵپێکردنی چەند گەنجێک بووە بە کچان و ئافرەتان.

ڕاگەیێنراوی فەرمی: لیوا لەتیف عەبدولڕەزا، فەرماندەی پۆلیسی پارێزگای بەسڕە ڕایگەیاند:

فەرمانم کردووە هەڵمەتێکی تووند دژی ئەوانە بکرێت کە دەستدرێژیی دەکەنەسەر کچان و ئافرەتان لە شوێنە گەشتیاریی و گشتییەکان و گێچەڵیان پێ دەکەن، ڕێککاریش دژی ئەوانە دەگرینەبەر کە گرژیی دروستدەکەن.

ئەم جۆرە ڕەفتارە پێچەوانەی عورف و دابونەریتی کۆمەڵگایە و پێشێلکردنی شکۆ و باوەڕی گشتییە، ڕێککاری تووند دژیی ئەنجامدەرانی دەگرینەبەر.

هێزە ئەمنییەکان درێغی ناکەن بۆ سەپاندنی ئاسایش و پاراستنی کۆمەڵگا دژی هەموو ڕەفتارێک کە پێچەوانەی ڕەوشت و ئاسایشی کۆمەڵایەتی بێت.