وتەبێژی سەربازیی سوودانی: داعش تێكشکاوە و زۆرێک لە سەرکردەکانی کوژراون

ئاڤا نیوز

وتەبێژی فەرماندەی گشتیی هێزە چەکدارەکانی عێراق دەڵێت، لەم دوو ساڵەی دواییدا داعش زیانێکی گەورەی بەرکەوتووە و زۆرێک لە سەرکردەکانی کوژراون، جەختیش دەکاتەوە کە ئێستا ئاسایشی سنوور بەهۆکاری بوونی ئامێری پێشکەوتوو باشتر پارێزگاریی لێدەکرێت.

وێنە گەورەکە: دوای ڕووخانی دەسەڵاتەکەی ئەسەد، زۆرترین نیگەرانیی هێزە ئەمنییەکانی عێراق لەگەڵ سنووری سووریایە، ئەویش بەهۆکاری ئەوەی مەترسییان هەیە شانە نوستووەکانی داعش و گرووپە چەکدارەکانی دیکە بۆشایی ئەمنیی ئەو وڵاتە بقۆزنەوە و بێنەناو خاکی عێراق.

لێدوانی فەرمی: سەباح نوعمان، وتەبێژی فەرماندەی گشتی هێزە چەکدارەکانی عێراق ڕایگەیاند:

فەرماندەی گشتیی لەنزیکەوە چاودێری هەوڵەکان دەکات بۆ ڕووبەڕووبوونەوەی پاشماوەکانی ڕێکخراوی تیرۆرستی داعش.

ساڵی ڕابردوو ژمارەیەکی زۆری سەرکردەی داعش کوژراون، لەوانەش 18 سەرکردەی ڕێكخراوەکە لە هێرشێکدا کوژران لەگەڵ کوژرانی ئەبو خەدیجە لەم دواییەدا کە والی داعش بووە لە عێراق و سووریا.

لە ڕووبەڕووبوونەوەی تیرۆر، تاوانی ڕێکخراو و کۆکردنەوەی زانیاریی هەواڵگیریدا، هێزە ئەمنییەکانمان ئەزموونی گەورەیان بەدەستهێناوە.

هێزەکانی پاسەوانی سنوور بە پشتیوانی سوپا، حەشدی شەعبی و کەرەستە و چەکی پێشکەوتوو توانیویانە ئاسایشی سنوور بەگشتی و بەتایبەت لەگەڵ سووریا بپارێزن، بەهۆی ڕاهێنانی بەردەوام و گەشەپێدانی تواناکانیشیان، ئێستا هێزەکانمان بەراورد بە ڕابردوو بەشێوەیەکی بنەڕەتی گۆڕاون