وەقفی سوننی عێراق بەهۆی ڕۆژی جەژنەوە سزای مامۆستایەکی ئایینی دەدات

ئاڤا نیوز

بەهۆی ئەوەی دیوانی وەقفی سوننی عێراقی تۆمەتبارکردووە بەوەی بە "دەستوەردانی سیاسی" لە دیارکردنی ڕۆژی جەژن، مامۆستایەکی ئاینیی لە بەغدا سزادەدرێت و لە وتاردان دوور دەخرێتەوە.

چیرۆکی سەرەکی: پەیوەست بە یەکەم ڕۆژی جەژن، ڕۆژی یەکشەممەی ڕابردوو شەقامی سوننی عێراقی بەشێوەیەکی قووڵ دابەش بوو، دوای ئەوەی دیوانی وەقفی سوننی پێچەوانەی سعوودیە بڕیاریدا کە مانگ لە وڵاتدا نەبینراوە بۆیە یەکشەممەی وەک جەژن دیارنەکرد، بەڵام یەکێتیی زانایانی مسوڵمانانی عێراق کە ئەویش دامەزراوەیەکی سوننی وڵاتەکەیە یەکشەممەی کردە جەژن.

لێدوانی فەرمی: عەقیل ئەلفەهداوی، وتاربێژی مزگەوتی مستەفا لە ناوچەی عامریەی بەغدا ڕایگەیاند، بەهۆی ئەوەی دژی بڕیارەکەی دیوانی وەقفی سوننی ناڕەزایی دەربڕیووە و باوەڕی وابوو "دەستوەردانی سیاسی" لە دیارکردنی یەکەم ڕۆژی جەژندا هەبووە، دیوانی وەقفی سوننی بڕیاریدا لە وتاردان و پێشنوێژی دووری بخاتەوە و بۆ شوێنێکی دیکە بیگوازێتەوە.

باکگراوند: شەممەی ڕابردوو دیوانی وەقفی سوننی عێراق سەرجەم مامۆستایانی ئاینیی ئاگادار کردەوە کە نابێت ڕۆژی یەکشەممە نوێژی جەژن لە مزگەوتەکان بکەن، ئەوەشی پابەند نەبێت لێپرسینەوەی لەگەڵ دەکرێت.