سوودانی یادی ڕۆژی شەهیدی کوردانی فەیلی دەکاتەوە

ئاڤا نیوز

سەرۆکوەزیرانی عێراق دەڵێت، کوردانی فەیلی لەلایەن ڕژێمی بەعسی ڕووخاوەوە ڕووبەڕووی نەهامەتی گەورە بوونەتەوە و شەهیدەکانیان بەڕێزەوە یاد دەکەنەوە، جەختیش دەکاتەوە کە هەوڵەکانیان بۆ گەڕانەوەی مافەکانیان بەردەوام دەبێت.

وێنە گەورەکە: لە ساڵانی هەشتاکانی سەدەی ڕابردوو حکومەتی بەعس هەڵمەتێکی فراوانی بۆ جينۆسايد و بەزۆرەملێ کۆچپێکردنی زیاتر لە ملیۆنێک کوردی فەیلی دەستپێکرد و دەستیشی بەسەر موڵک و ماڵەکانیاندا گرت، لەوکاتەوە تاوەکو ئێستا تەنیا 100 هەزار کوردی فەیلی مافەکانیان بۆ گەڕاوەتەوە و ئەوانی دیکە هێشتا لە چاوەڕوانی وەرگرتنەوەی مافەکانیاندان.

لێدوانی فەرمی: محەممەد شیاع سوودانی، سەرۆکوەزیرانی عێراق ئەمڕۆ 2ـی نیسان کە هاوکاتە لەگەڵ ڕۆژی شەهیدی کوردی فەیلی، لەگەڵ بەشێک لە کەسوکاری شەهیدانی کوردی فەیلی کۆبووەوە و ئاماژەی بەوەکرد، یادی ئەو تاوانانە دەکەنەوە کە ڕژێمی بەعسی ڕووخاو دژ بە کوردانی فەیلی ئەنجامیداون، ئێستاش وەزارەتی ناوخۆ پەیوەست بە دۆسیەی ڕەگەزنامە و ڕاستکردنەوەی مامەڵەی کوردانی فەیلی لە کارەکانی بەردەوامە.

بەشێکی دیکە لە قسەکانی سوودانی:

٠ فەرمانمان کردووە ڕێکارە یاساییەکان بۆ قەرەبووکردنەوەی قوربانیان و گەڕانەوەی مافە زەوتکراوەکان تەواو بکرێن، تاوانەکانیش دۆکیومێنت بکرێن.

٠ بە هەماهەنگی لەگەڵ دادگا تایبەتمەندەکان چاودێری دۆسییەکانی پەیوەست بە کوردانی فەیلی دەکەین، ڕێنماییشمان داوە بە پارێزگاکانی دیالە و واست ناوچەکانی کوردانی فەیلی ئاوەدان بکەنەوە.

٠ هەوڵی لابردنی هەموو ئاستەنگییەک کە بەهۆی بڕیارەکانەوە بۆ مافی کوردانی فەیلی دروست دەبن، دەدەین.

٠ ئەوەی بۆ شەهیدانی فەیلی کردوومانە بەشێکە لە ئەرکی سەشانمان بەرامبەر قوربانییەکانیان.