دیوانی وەقفی سوننی دوورخستنەوەی چەند مامۆستایەکی ئاینیی لە وتاردان ڕەتدەکاتەوە

 

ئاڤا نیوز

دیوانی وەقفی سوننی دوورخستنەوەی چەند مامۆستایەکی ئاینیی لە وتاردان بەهۆی هەڵوێستییان لە دیارکردنی یەکەم ڕۆژی جەژنی ڕەمەزان ڕەتدەکاتەوە.

وێنە گەورەکە: دوای ئەوەی دیوانی وەقفی سوننی پەشیمانبووەوە لەبینینی مانگ و  یەکشەممەی کردە تەواوکەری مانگی ڕەمەزان، لەبەرامبەردا یەکێتیی زانایانی مسوڵمانانی عێراق کە ئەویش دامەزراوەیەکی فەرمی سوننەی عێراقە یەکشەممەی کردە جەژن، سوننەکانی عێراق دابەشی دوو بەرە بوون.

چیرۆکی سەرەکی: بەشێک لەمیدیا عێراقییەکان و تۆڕە کۆمەڵایەتییەکان لەسەر زاری عەقیل ئەلفەهداوی، وتاربێژی مزگەوتی مستەفا لە ناوچەی عامریەی بەغدا بڵاویانکردەوە، ناوبراو بەهۆی ئەوەی دژی بڕیارەکەی دیوانی وەقفی سوننی ناڕەزایی دەربڕیووە و باوەڕی وابوو "دەستوەردانی سیاسی" لە دیارکردنی یەکەم ڕۆژی جەژندا هەبووە، دیوانی وەقفی سوننی بڕیاریدا لە وتاردان و پێشنوێژی دووری بخاتەوە و بۆ شوێنێکی دیکە بیگوازێتەوە.

ڕاگەیێنراوی فەرمی: لە ڕاگەیێنراوێکدا دیوانی وەقفی سوننی ڕایگەیاند: بەشێک لەکەناڵەکانی ڕاگەیاندن و تۆڕە کۆمەڵایەتییەکان هەواڵی هەڵە و نا تەندروستییان سەبارەت بەدوورخستنەوەی شێخ موئەییەد مەشهەدانی و شێخ عەقیل فەهداوی لەوتاردان بڵاوکردووەتەوە.

ئەم هەواڵە دوورە لەڕاستییەوە و بەهیچ شێوەیەک و بەهیچ فەرمانێک بریاری دوورخستنەوەی ئەوانە نەدراوە و لەسەر کارەکانی خۆیان بەردەوامن.