داوای دەرکردنی باڵیۆزی ئەمریکا لە بەغدا دەکرێت

ئاڤا نیوز

 

دوای بڕیارەکەی ترەمپ بۆ سەپاندنی باج بەسەر هەناردەی کاڵای وڵاتان لەنێویاندا عێراق  بۆ ئەمریکا، پەرلەمانتارێکی عێراق داوای دەستبەجێ دەرکردنی باڵیۆزی ئەمریکا لە بەغدا دەکات.

 

وێنە گەورەکە: دۆناڵد ترەمپ، سەرۆکی ئەمریکا زنجیرەیەک باجی نوێی  بەسەر دەیان وڵاتی جیهان سەپاند و بە تەواوەتی جەنگی ئابووری لە دژی وڵاتانی جیهان ڕاگەیاند، بەگوێرەی بڕیارەکەش هەر کاڵایەکی عێراقی هەناردەی ئەمریکا بکرێت بەڕێژەی 39% باجی دەخرێتەسەر.

 

ڕاگەیێنراوی فەرمی: زەینەب موسەوی، پەرلەمانتاری عێراق لە تویتێکدا لە پلاتفۆرمی ئێکس داوای دەرکردنی باڵیۆزی ئەمریکا لە بەغدا و داخستنی باڵیۆزخانەکە و کۆتاییهێنان بە هاوکارییەکانی لەگەڵ ئەمریکا کرد.

 

زانیاریی زیاتر: موسەوی ئاماژەی بەوەشکرد سیاسەتی نوێی ترەمپ بە سەپاندنی باجی گومرگی بە ڕێژەی 39% لە دژی عێراق، هەنگاوێکی هەڵکشانە لە دژی ئابووریی بەغدا.

 

لەلایەکی دیکەوە: فەرهاد عەلائەدین، ڕاوێژکاری سەرۆکوەزیرانی عێراق بۆ پەیوەندییەکانی دەرەوە ڕاگەیاند، بڕیارەکەی ترەمپ کاریگەرییەکی ئەوتۆی لەسەر عێراق نابێت، چونکە کەرتی وزە و  نەوت ناگرێتەوە و هەناردەی عێراقیش بۆ ئەمریکا زۆر سنووردارە.