کۆمیسیۆن: پابەندین بە ئەنجامدانی هەڵبژاردن لە وادەی دیاریکراودا

 

ئاڤا نیوز

کۆمیسیۆنی باڵای سەربەخۆی هەڵبژاردنەکان، پابەندبوونی دەستووری و یاسایی خۆی بە ئەنجامدانی هەڵبژاردن لە وادەی دیاریکراوی خۆیدا دووپات کردەوە و ئاماژە بۆ ئەوە دەکات ژمارەی دەنگدەرانی نوێ کە لە دوای ساڵی 2007 لەدایکبوون، یەک ملیۆنی تێپەڕاندووە.

وێنە گەورەکە: بڕیارە لەکۆتایی ئەمساڵ هەڵبژاردنی پەرلەمانی عێراق بکرێت، چاوەڕوان دەکرێت ڕکابەرییەکی تووند لە نێوان لایەنە سیاسییەکان هەبێت و گۆڕانکاریش لە نەخشەی سیاسیی ئێستای عێراق ڕووبدات. کۆمیسیۆنیش پابەندبوونی خۆی بە وادەی دیاریکراو دووپات دەکاتەوە کە لە لایەن ئەنجوومەنی وەزیرانەوە دیاریکراوە.

لێدوانی فەرمی: جومانە غەلای، وتەبێژی کۆمیسیۆنی باڵای هەڵبژاردنەکانی عێراق ڕایگەیاند:  کۆمیسیۆنی هەڵبژاردنەکان لە ڕووی دەستووری و یاساییەوە پابەندە بە ئەنجامدانی هەڵبژاردن لە وادەی دیاریکراوی خۆیدا.

لە هەمان كاتدا: پرۆسەی نوێنکردنەوەی تۆماری دەنگدەران لەڕێگەی 1079 ناوەندی تۆمارکردنەوە لە سەرتاسەری عێراق بۆ پێشوازیکردن لە دەنگدەران بەردەوامە. هاوکات کۆمیسیۆن کار لەسەر نۆژەنکردنەوە و ئامادەکردن و پاراستنی ئامێرەکانی هەڵبژاردن دەکات بۆ دڵنیابوون لە بەڕێوەبردنی کارامەی پرۆسەی هەڵبژاردن.

لە لایەكی دیكەوه: سەبارەت بەئەوانەی کێشەی خوێندوەی پەنجەمۆریان هەیە، ڕایگەیاند، مافی ئەو دەنگدەرانەی کە کێشەی خوێندنەوەی پەنجەمۆریان هەیە، لەڕێگەی بەکارهێنانی تەکنەلۆژیای ناسینەوەی چاو و دەموچاوەوە چارەسەر دەکرێت.