10 گەشتیار بە ماددەی هۆشبەرەوە دەستگیر دەکرێن

ئاڤا نیوز

هێزە ئەمنییەکانی عێراق لە سنووری پارێزگاکانی بەسرە، دیالە، واست و میسان 10 گەشتیاریان دەستگیر کرد کە ماددەی هۆشبەریان پێبووە، شەشیان بیانین.

 

وێنە گەورەکە: هێزە ئەمنییەکانی عێراق لە سێ مانگی ئەمساڵدا، هەزار و 559 بازرگانی ماددەی هۆشبەریان دەستگیرکردووە، لەنێویاندا 194 بازرگانی نێودەوڵەتین و هەزار و 365 بازرگانی دیکەشیان ناوخۆیین، دەستیشیان بەسەر دوو تۆن و 156 کیلۆگرام ماددەی هۆشبەردا گرتووە.

 

ڕاگەیێنراوی فەرمی: بەگوێرەی وەزارەتی ناوخۆی عێراق، لە چوارچێوەی هەوڵەکانی فەرماندەیی هێزە سنوورییەکان بۆ ڕێگریکردن لە هاتنەناوەوەی ماددەی هۆشبەر، لە ژمارەیەک ئۆپەراسیۆنی جیا، هێزەکانی سەر بە بنکەکانی پۆلیسی گومرگی شەلامچە، زوورباتیە، مونزیرییە و شەیب سەر بە بەڕێوەبەرایەتیی پۆلیسی گومرگی توانیان 10 گەشتیار دەستگیر بکەن.

 

زانیاریی زیاتر: شەش لەو گەشتیارانە بیانین، کە ماددەی هۆشبەری جۆراوجۆریان پێبووە، لەوانە "هێرۆین، کریستاڵ، ماریجوانا، ترامادۆڵ و حەشیش"، سەرجەم تۆمەتبارەکانیش لەگەڵ ماددە دەستبەسەرداگیراوەکان ڕەوانەی دەسەڵاتی دادوەری کران.