عێراق و ئەمریکا تاوتوێی بەهێزکردنی هاوکاری و هەماهەنگی لە بواری سەربازیدا دەکەن

 

ئاڤا نیوز

سەرۆک ئەرکانی سوپای عێراق و فەرماندەی هێزەکانی هاوپەیمانی نێودەوڵەتی لە عێراق و سووریا تاوتوێی بەهێزکردنی هاوکاری و هەماهەنگی لە بواری سەربازی و پەرەپێدانی تواناکانی سوپای عێراق دەکەن.

چیرۆکی سەرەکی: ڕۆژی شەممە 5ـی نیسانی 2025، عەبدولئەمیر ڕەشید یاروڵڵا، سەرۆک ئەرکانی سوپای عێراق، پێشوازی لە ژەنەڕاڵ کیڤن لیهی، فەرماندەی هێزەکانی هاوپەیمانی نێودەوڵەتی لە عێراق و سووریا و شاندی یاوەری کرد.

ڕاگەیێنراوی فەرمی: بەگوێرەی ڕاگەیێنراوی وەزارەتی بەرگریی عێراق، لە کۆبوونەوەکەدا هەردوولا باسیان لە ڕێگاکانی بەهێزکردنی هاوکاریی سەربازیی هاوبەش و هەماهەنگی کرد، بەتایبەتی لە بوارەکانی مەشق و ڕاهێنان و پڕچەککردن و پشتیوانی لۆجستی بۆ پەرەپێدانی تواناکانی سوپای عێراق، بۆ دڵنیابوون لە ئامادەیی بۆ ڕووبەڕووبوونەوەی ئاستەنگە تیرۆریستییەکان و پاراستنی سەقامگیری وڵات.

ئەوەی پێویستە بیزانیت: ئەگەرچی لە عێراق بە ئاشکرا داوای دەرکردنی هێزەکانی ئەمریکا لە عێراق دەکرێت و لە ڕابردووشدا بەغداو واشنتن لەسەر ئەوە ڕێککەوتبوون کشانەوەی ئەو هێزانە تاوەکو  ساڵی 2026 بێت، بەڵام بابەتی کشانەوەکە گۆڕاوە بۆ هاوبەشی ئەمنیی دوولایەنە، بەشێوەیەک پاڵپشتی هێزە عێراقییەکان بکات لەپێناو کەمکردنەوەی مەترسیی داعش.