پەیوەندییەکانی عێراق: بۆ قەدەغەکردنی تیکتۆک چاوەڕێی بڕیاری پەرلەمانین

ئاڤا نیوز

وەزارەتی پەیوەندییەکانی عێراق، داواکارییەکی بۆ قەدەغەکردنی تیکتۆک پێشکەشی پەرلەمان کردووە و ئەگەر پەسەند بکرێت، تۆڕی کۆمەڵایەتی تیکتۆک لە عێراق قەدەغە دەکرێت.

وێنە گەورەکە: بەگوێرەی سەنتەری میدیایی ئەلیکترۆنی، لە عێراق 34 ملیۆن و 300 هەزار کەس تۆڕی کۆمەڵایەتی تیکتۆک بەکاردەهێنن و لەڕووی بەکارهێنەرەوە لە پلەی یەکەم دایە، بەڵام بەشێک لە خەڵکیش دەڵێن، هەندێک ڕەفتاری ناو تیکتۆک لەگەڵ کولتووری خەڵکی عێراق ناگونجێن و کاریگەرییان لەسەر پەروەردە و تێکچوونی شیرازەی خێزان و کۆمەڵگا دەبێت.

لێدوانی فەرمی: هەیام یاسری، وەزیری پەیوەندییەکانی عێراق بۆ ئاژانسی هەواڵی فەرمی عێراق ڕایگەیاند:

٠ ئێستا کاری لەپێشینەی وەزارەتەکەمان تەواوکردنی ڕێکارەکانی مۆڵەتدانە بە هێڵی پەیوەندی نیشتیمانی و دابینکردنی هێڵی خێرایی ئینتەرنێت بۆ زۆرترین هاووڵاتی وڵات، ئەم کۆمپانیایەش بە تەکنۆلۆجیای نەوەی پێنجەم 5G دەستبەکاردەبێت.

٠ پێشتر داواکارییەکمان بۆ داخستنی تیکتۆک پێشکەشکردبوو، دوای ئەوەی زۆرینە خێزانەکانی عێراق بانگەوازییان بۆ کردین کە ئەم تۆڕە لەگەڵ ڕەوشت و بەهاکانی گەل و خێزانەکانمان یەکناگرێتەوە.

٠ بۆ داخستنی تیکتۆک ئێمە خاوەن بڕیار نین و داواکارییەکەشمان وەڵام نەدراوەتەوە، ئومێدەوارین پەرلەمان بڕیارێک لەم بارەیەوە دەربکات و ئێمەش وەک خۆی جێبەجێی دەکەین.