حکومەتی عێراق بە چوار بڕیار وەڵامی ترەمپ دەداتەوە

ئاڤا نیوز

حکومەتی عێراق ڕایگەیاند، بڕیارەکەی سەرۆکی ئەمریکا بۆ زیادکردنی باج لەسەر کاڵای وڵاتان بەهۆی جیاوازی لە هاوسەنگی بازرگانی (هاوردە و هەناردە) دەرکراوە و زۆرینەی کاڵای ئەمریکاش لەڕێگەی بازاری وڵاتانی دیکەوە دێتە عێراق، بۆیەش بڕیاردرا کار بکرێت بۆ کردنەوەی لق و بریکاری کۆمپانیا بازرگانییەکانی ئەمریکا و بازرگانیی ڕاستەوخۆ لەگەڵ ئەو وڵاتە، لەگەڵ گەشەپێدانی خزمەتگوزاریی بانکیی و بەهێزکردنی پەیوەندییە بازرگانییەکان لەگەڵ ئەمریکا.

وێنە گەورەکە: 2ـی نیسان دۆناڵد ترەمپ، سەرۆکی ئەمریکا زنجیرەیەک باجی نوێی  بەسەر دەیان وڵاتی جیهان سەپاند و بە تەواوەتی جەنگی ئابووری لە دژی وڵاتانی جیهان ڕاگەیاند، بەگوێرەی بڕیارەکەش هەر کاڵایەکی عێراقی هەناردەی ئەمریکا بکرێت بەڕێژەی 39% باجی دەخرێتەسەر.

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق بڵاویکردەوە، محەممەد شیاع سوودانی، سەرۆکوەزیران سەرپەرشتی کۆبوونەوەیەکی کرد بۆ تاوتوێکردنی کاریگەرییە ئابووریی و بازرگانییەکانی بڕیارەکەی سەرۆکی ئەمریکا بۆ زیادکردنی باج لەسەر کاڵای وڵاتان، بەتایبەتیش کە بڕیارەکە لەسەر بنەمای هاوسەنگی بازرگانی دەرکراوە و زۆرینەی کاڵای ئەمریکاش لەڕێگەی وڵاتانی دیکەوە دێتە وڵات، ئەویش بەهۆی سیاسەتی کۆمپانیاکانی ئەمریکا کە لە مامەڵەیاندا لەگەڵ عێراق پەیڕەوی لێ دەکەن.

لە کۆبوونەوەکەدا و بۆ پاراستنی "گەشەی ئابووری عێراق" بڕیاردرا بە:

یەکەم؛ لەڕێگەی کردنەوەی بریکاری کۆمپانیا بازرگانییەکانی ئەمریکا، چالاککردنی بریکاری کۆمپانیا بازرگانییەکانی عێراق و مامەڵەی بازرگانی ڕاستەوخۆ لەگەڵ کۆمپانیاکانی ئەمریکا، کار بۆ گەشەپێدانی پەیوەندییە بازرگانییەکان بکرێت.

دووەم؛ کار بکرێت بۆ گەشەپێدانی خزمەتگوزاریی بانکیی لەنێوان کەرتی بانک و دارایی عێراق و ئەمریکا، بەجۆرێک بەرژەوەندییە ئابوورییەکانی هەردوولا بەدیبهێنێت.

سێیەم؛ تیمی گفتوگۆ لەگەڵ لایەنی ئەمریکی ڕاسپێردرا پێداچوونەوە بە بنەمای پەیوەندی بازرگانیی لەگەڵ ئەمریکا بکات بەمەبەستی بەهێزکردن و باشترکردنی، تا پەیوەندییەکی ئابووری و بازرگانیی هاوسەنگ لەسەر بنەمای بەرژەوەندی هاوبەش و هاوبەشی ئەرێنیی بونیاد بنرێت.

چوارەم؛ وەزارەتەکانی دەرەوە، دارایی، بازرگانیی و لایەنە پەیوەندییدارەکان کەناڵی گفتوگۆ لەگەڵ هاوتا ئەمریکییەکانیان بکەنەوە، ئەویش بەجۆرێک ببێتە مایەی زیاتر بەهێزکردنی پەیوەندییە بازرگانییەکان و چاودێری بازارە داراییەکان، هەفتانەش لەسەر ئەم بابەتە ڕاپۆرت بۆ نووسینگەی سەرۆکوەزیران بەرزبکرێتەوە.