پڕۆژەکەیەکی کۆنگرێسی ئەمریکا گرووپە چەکدارەکانی عێراق دەخاتە "ئەوپەڕی" حاڵەتی ئامادەباشییەوە

ئاڤا نیوز

پڕۆژەیاسای "ڕزگارکردنی عێراق لە ئێران" کە پێشکەشی کۆنگرێسی ئەمریکا کراوە، گرووپە چەکدارەکانی عێراقی خستە ئەوپەڕی حاڵەتی ئامادەباشییەوە و سەرکردەکانیان بەهۆی مەترسی بە ئامانج گرتنیان، لە شوێنی نادیار دەمێننەوە.

چیرۆکی سەرەکی: چەند ڕۆژێكە بەشێک لە ئەندامانی کۆنگرێسی ئەمریکا پڕۆژەیاسایەکیان بەناوی "ڕزگارکردنی عێراق لە ئێران" پێشکەشکردووە، بەگوێرەی پڕۆژەکەش وەزارەتی دەرەوە و خەزێنەی ئەمریکا دەبێت لە ماوەی 180 ڕۆژدا هەژموونی ئێران لە عێراق کەمبکەنەوە، هاوکات داواکراوە حەشدی شەعبی هەڵبوەشێنرێتەوە یان بخرێتە لیستی تیرۆرەوە، پێشنیازیش کراوە 11 گرووپی چەکدار و 12 کەسایەتی سیاسیی بخرێنە لیستی سزاکانەوە، گرووپ و کەسایەتیی سەر بە ئێرانیش لەناو دامەزراوەکانی عێراق دووربخرێنەوە.

زانیاریی بەدەستهاتوو: ڕۆژنامەی مەدا لە ژمارەی ئەمڕۆیدا و پاڵپشت بەو زانیارییانەی لە گرووپە چەکدارەکان دەستیکەوتووە، ئاماژەی بەوەکردووە، چەند مانگێکە بەشێک لە بارەگای گرووپە چەکدارەکان چۆڵکراون و پێنج مانگیشە هەموو چالاکییەکی گرووپەکان ڕاگیراون، هاوکات لەگەڵ مەترسی هێرش بۆسەر تاران، "ئێمەش ڕێکاری ئەمنییمان گرتوونەتەبەر بەهۆی مەترسی بەئامانج گرتنمان، سەرکردەکانی هێڵی یەکەم و دووەم و تەنانەت سێیەمی گرووپەکانمان، چوونەتە شوێنی نەزانراو و وەک ڕێکارێکی خۆپارێزی خۆیان شاردووەتەوە".

ئەوەشی خستووەتەڕو، گرووپە چەکدارەکان بەرزترین ئاستی خۆپارێزییان لە پێنج ساڵی ڕابردوودا گرتووەتەبەر و چوونەتە حاڵەتی ئەوپەڕی ئامادەباشیی (ج).

لە لایەکی دیکەوە: ماوەی دوو مانگە حکومەتی عێراق لەگەڵ چوار گرووپی چەکدار لە دانوستان دایە کە پابەندی ڕێنماییەکانی دەستەی حەشدی شەعبی نابن، پڕۆژەیاسای نوێی حەشدی شەعبیش هەوڵێکە بۆ ڕێگریی لە گەڕانەوەی ئەو گرووپانە و دوورخستنەوەی عێراق لە تێوەگلانی لە گرژییەکانی ناوچە.