حکومەتی عێراق ڕەزامەندی لەسەر پێدانی زەوی بە سەرجەم مامۆستایان دەدات

 

ئاڤا نیوز

سەرۆکوەزیرانی عێراق ڕەزامەندی لەسەر تەرخانکردنی پارچە زەوی نیشتەجێبوون بە سەرجەم مامۆستایان دەدات.

چیرۆکی سەرەکی: ڕۆژی یەکشەممە 2025-04-06، کۆبوونەوەی ئەنجوومەنی هەماهەنگی بە سەرۆکایەتی، محەممەد شیاع سوودانی، سەرۆکوەزیرانی عێراق و بە ئامادەبوونی وەزیری پەروەردە و ژمارەیەک لە وەزارەت و پارێزگارە پەیوەندیدارەکان بەڕێوەچوو. لە میانی ئەو کۆبوونەوەیە بڕیاری تەرخانکردنی پارچە زەوی نیشتەجێبوون لە بەرژەوەندی مامۆستایان درا.

ڕاگەیێنراوی فەرمی: بەگوێرەی ڕاگەیێنراوی وەزارەتی پەروەردەی عێراق، بۆ پشتیوانی لە بارودۆخ و گوزەرانی مامۆستایان، محەممەد شیاع سوودانی، سەرۆکوەزیرانی عێراق ڕەزامەندی دەربڕی لەسەر تەرخانکردنی پارچە زەوی نیشتەجێبوون بۆ سەرجەم مامۆستایان هاوکات لەگەڵ دابینکردنی خزمەتگوزارییەکان.

ئەوەی پێویستە بیزانیت: ڕۆژی 6ـی نیسان کە هاوکات بوو لەگەڵ یەکەم ڕۆژی دەوام لە دوای پشووەکانی جەژنی ڕەمەزان، مامۆستا و فەرمانبەرانی وەزارەتی پەروەردە لە هەموو پارێزگاکانی عێراق بایکۆتی دەوامیان کرد و چەند داواکارییەکیان ئاراستەی حکومەت کرد.

زانیاریی زیاتر: داواکارییەکانی مامۆستا و فەرمانبەرانی پەروەردە خۆی لە زیادکردنی مووچە، دابینکردنی یەکەی نیشتەجێبوون، بە هەمیشەییکردنی مامۆستایانی گرێبەست، زیادکردنی دەرماڵەی پیشەیی و خێزان و منداڵ و چەند داواکارییەکی دیکەدا دەبینێتەوە.