دەست بەسەر 400 هەزار دەنکە حەبی کەپتاگۆندا دەگیرێت

ئاڤا نیوز

وەزارەتی ناوخۆی عێراق، پووچەڵکردنەوەی هەوڵێک بۆ بەقاچاخهێنانی 400 هەزار دەنکە حەبی ماددەی هۆشبەر لە جۆری کەپتاگۆن لە سووریاوە بۆ عێراق ڕادەگەیێنێت.

 

وێنە گەورەکە: ئامارەکانی بەکارهێنان و بازرگانیکردن بە ماددەی هۆشبەر لە عێراق زیادیان کردووە، بەگوێرەی بەدواداچوونێکی دەستەی سەربەخۆی مافی مرۆڤی عێراق، کریستاڵ و حەبی کەپتاگۆن زۆرترین بەکارهێنەری لەعێراق هەیە، کە لە وڵاتانی دراوسێ و بە تایبەت لە سووریاوە دەهێنرێتە نێو عێراق.

 

ڕاگەیێنراویی فەرمی: بەگوێرەی ڕاگەیێنراوێکی میقداد میری، وتەبێژی وەزارەتی ناوخۆی عێراق دەستکەوتە ئەمنییەکان لەلایەن هێزە سنوورییەکانەوە بۆ ڕێگریکردن لە بازرگانیکردن بە ماددە هۆشبەرەکانەوە بەردەوامەو لەو چوارچێوەیەش هێزەکانی سنوور تونیان شکست بە هەوڵێکی گواستنەوەی 400 هەزار حەبی کەپتاگۆن لە سووریاوە بۆ عێراق بهێنن.

 

شێوازی جێبەجێکردن: بە گوتەی میری، حەبەکان لەنێو ژمارەیەک دەفری پلاستیکی "جلیکان" دانراون، پلانەکە بەو شێوەیە بووە لە ڕێگەی ڕووباری فوراتەوە لە ناوچەی باهۆزی سووریاوە بەڕێ بکرێت بەرەو سنووری عێراق، بەڵام لە ڕێگای کامێرکانی چاودێرییەوە تێبینی ئەو جلیکانانە کراوەو توانیوانە دەستی بەسەردا بگرن.

 

ئەوەی پێویستە بیزانیت: لە سەردەمی دەسەڵاتی بەشار ئەسەد، سووریا ببوو بە ناوەندی بەرهەمهێنانی حەبی کەپتاگۆن و لەوێوە ڕەوانەی وڵاتانی دیکەی عەرەبی دەکرا، لەم بوارەشدا حکومەت بە کارئاسانیکردن بۆ بەرهەمهێنانی ئەو ماددە هۆشبەرە تۆمەتبار دەکرا.