لێبووردنی نێودەوڵەتی: 91% حاڵەتەکانی لەسێدارەدان لە عێراق و دوو وڵاتی دراوسێی بوون

ئاڤا نیوز

 

ڕێکخراوی لێبووردنی نێودەوڵەتی دەڵێت، ساڵی ڕابردوو زیاتر لە هەزار و 500 کەس لە جیهاندا لەسێدارەدراوە، ئەوەش بەرزترین ژمارەی لەسێدارەدانە لە ساڵی 2015ەوە. جەختیش دەکاتەوە کە 91% حاڵەتەکانی لەسێدارەدان، لە عێراق و دوو وڵاتی دراوسێی بوون.

 

ئەوەی پێویستە بیزانیت: ساڵی 2023 لە جیهاندا هەزار و  153 کەس لەسێدارەدرابوون، لەو ساڵەدا لە عێراق 16 کەس لەسێدارەدرابوون، بەڵام ساڵی 2024 ژمارەکە چوار بەرامبەر زیادبووە و حکومەتی عێراق سزای لەسێدارەدانی بەسەر 63 کەسدا جێبەجێکردووە.

 

ڕاگەیێنراوی فەرمی: ڕێکخراوی لێبووردنی نێودەوڵەتی لە کۆتا ڕاپۆرتی خۆیدا ئاماژەی بەوەشداوە، ساڵی ڕابردوو لە عێراق و ئێران و سعودیە هەزار و 380 کەس لەسێدارەدراون (عێراق 63 کەس، سعودیە 345 کەس و ئێرانیش لانیکەم 972 کەس)

 

زانیاریی زیاتر: "زۆرینەی ئەوانەی ساڵی 2024 لەسێدارەدراون، بە تۆمەتی پەیوەست بە تیرۆر و ماددەی هۆشبەر سزایان بەسەردا سەپێنراوە".

 

لەلایەکی دیکە: لە بەشێکی دیکەی ڕاپۆرتەکەدا هاتووە، ساڵی ڕابردوو تەنیا لە 15 دەوڵەتدا سزای لەسێدارەدان جێبەجێکراوە لە ئێران و سعودییە و بەشێکی دیکە لە وڵاتانی ڕۆژهەڵاتی ناوەڕاست. سزای لەسێدارەدان وەک چەکێک بۆ بێدەنگکردنی خەڵکی ناڕازیی، ترساندنی خەڵک و ڕووبەڕووبوونەوەی ئۆپۆزسیۆنی سیاسی بەکاردەهێنرێت.

 

ئەوەی پێویستە بیزانیت: ئامارەکە ئەو هەزاران کەسە لە خۆناگرێت کە باوەڕ وایە لە وڵاتانی چین، کۆریای باکوور و ڤێتنام لەسێدارەدرابن و لەو وڵاتانە ئاماری ورد بەردەست نییە، بەهۆی دۆخی فەڵەستین و سووریاش هیچ ئامارێکی ورد لەسەر حاڵەتەکانی لەسێدارەدان لەو دوو وڵاتەدا نییە.