دەزگای خێرخوازیی بارزانی 16 بارهەڵگر هاوکاری دیکە دەنێردرێتە ڕۆژئاوای كوردستان

ئاڤا نیوز

 

دەزگای خێرخوازیی بارزانی کاروانێکی دیکەی کۆمەک و هاوكارییەكان کە پێکهاتووە لە 16 بارهەڵگری گەورە دەنێرێتە ڕۆژئاوای كوردستان.

 

بۆچی گرنگە: لەگەڵ دەستپێكردنی شەڕ و ئاڵۆزییەكانی ڕۆژئاوای كوردستان، هەزاران خانەوادە لە كۆبانێ، ڕەققە و عەفرین ئاوارەی قامیشلۆ و عامودێ بوون، ڕەوشێكی نالەباری مرۆیی دەگوزەرێنن و پێویستییەکی زۆریان بە هاوکارییە.

 

چیرۆکی سەرەکی: ئەمڕۆ یەكشەممە 25-1-2026، لە کەمپەینی ئۆفیسی هەولێری دەزگای خێرخوازیی بارزانی 16 بارهەڵگری گەورە لەو كۆمەك و هاوكارییە مرۆییانەی کۆکراونەتەوە ڕەوانەی ڕۆژئاوای كوردستان دەكرێن، کە هەریەک لە دۆشەك، بەتانی، مۆكێت، خواردن، شیری منداڵان و كەرەستەی پاككەرەوە لەخۆدەگرن.

 

- تیمەکانی دەزگای خێرخوازیی بارزانی كە لە 150 کارمەندی گشت نووسینگەكانی دەزگا پێکهاتوون، لە ڕۆژئاوای کوردستانن، جگە لە یەکەم کاروانی هاوکارییەکانی کە 67 بارهەڵگر بوون، ڕۆژانە کاروانی دیکەش دەنێرێتە ڕۆژئاوای کوردستان.

زانیاریی زیاتر: ئەمە وێڕای ئەوەی دەزگای خێرخوازیی بارزانی ڕۆژانە دوو ژەمەخواردنی گەرمی بۆ سەدان خێزانی ئاوارەی نیشتەجێی نێو مزگەوت و قوتابخانەکانی قامیشلۆ، عامودێ، دێرك دابین كردووە، هاوکات لەسەر فەرمانی سەرۆكوەزیران مەسرور بارزانی، بڕی 100 هەزار لتر نەوتی سپی لەڕێگەی شەش تانكەرەوە گەیێنراونەتە شاری قامیشلۆ و ئەو پرۆسەیە بەردەوامی هەیە.

- لەهەمان کاتیشدا تیمە پزیشکییەکەی دەزگای خێرخوازیی بارزانی کە لە هەشت ئەمبوڵانس و دوو نۆرینگەی گەڕۆک پێکدێن، 25 پزیشک و یاریدەری پزیشک لەخۆدەگرێت، لە ماوەی سێ ڕۆژدا چارەسەری پێویستیان بۆ زیاتر لە 700 نەخۆش کردووە، بەردەوامیشن لە بینین و چارەسەرکردنی نەخۆش.