ناوەندەکانی خوێندن لە هەرێمی کوردستان پاڵپشتی ڕۆژئاوای کوردستان دەکەن

ئاڤا نیوز

وەک هاوسۆزی و پشتگیریکردن لە خۆڕاگری ڕۆژئاوای کوردستان، سەرجەم ناوەندەکانی خوێندن لە هەرێمی کوردستان دەکرێن بە سەکۆی پاڵپشتی ڕۆژئاوای کوردستان و چەندین چالاکی جۆراوجۆر ئەنجام دەدرێن. 

چیرۆکی سەرەکی: ئەمڕۆ یەکشەممە 25-1-2026 بەشێکی زانکۆ و پەیمانگە و ناوەندەکانی خوێندنی سەر بە وەزارەتی پەروەردە بە لەبەرکردنی جلی کوردی و ئەنجامدانی چالاکی، پاڵپشتی بۆ ڕۆژئاوای کوردستان دەردەبڕن.

ڕاگەیێنرای فەرمی: وەزارەتى خوێندنى باڵا و توێژینەوەى زانستى ڕاگەیێنراوێکی بڵاوکردووە دەڵێت: هەریەکە لە دیوانى وەزارەتى خوێندنى باڵا، سەرۆکایەتی زانکۆکان، ئەنجومەنی باڵای کوردستان بۆ پسپۆڕییە پزیشکییەکان، دەستەی كوردستانی بۆ دیراساتی ستراتیژی و توێژینەوەی زانستی، بەشە زانستییەکانی کۆلێژ و پەیمانگەکان، لە چەند ڕۆژی ڕابردوودا چالاکی مەدەنی و گردبوونەوەی ئاشتیخوازانەیان ئەنجامداوە، بە ئامانجی دەربڕینی هاوسۆزی و پاڵپشتیکردنی کوردانی ڕۆژئاوای کوردستان و چالاکییەکان بەردەوام دەبن.

لێدوانی فەرمی: سامان عەبدوڵڵا، بەڕێوەبەری ڕاگەیاندنی زانکۆی سەڵاحەددین بە ئاڤای ڕاگەیاند: جگە لەوەی لە کۆلێژەکانی زانکۆی سەڵاحەددین چالاکی جۆراوجۆر ئەنجام دەدرێت، هانی مامۆستایان و فەرمانبەران دەدرێت بەشداری لە کەمپەینەکانی بەخشینی کۆمەک بکەن بە ڕۆژئاوای کوردستان.

لەلایەکی دیکەوە: وەزارەتی پەروەردە ڕایگەیاندووە، بەهۆی ئەم بارودۆخە نالەبارەی ڕۆژئاوای کوردستان، داوا دەکرێت ئەمڕۆ یەکشەممە وانەی یەکەم لە سەرجەم قوتابخانە حکومی و ناحکومییەکان تەرخان بکرێت بۆ پاڵپشتی لە ڕۆژئاوای کوردستان.