سوودانی: بەعس خراپترین بووە لەو دەسەڵاتانەی حوکمی عێراقیان کردوووە

ئاڤا نیوز

 

سەرۆکوەزیرانی عێراق ڕایدەگەنێت، پاش ساڵانێکی زۆر لە نادادپەروەری و ستەم و وێرانکردنی وڵات و دەستدرێژیکردنە سەر هاووڵاتییان، کۆتایی بە ڕژێمی دیکتاتۆری هێنرا، کە "بە خراپترین دەسەڵات دادەنرێت کە تائێستا حوکمی عێراق و عێراقییەکانی کردبێت".

 

وێنە گەورەکە: ئەمڕۆ چوارشەممە 9ی نیسانی 2025، 22 ساڵ بەسەر ڕووخانی ڕژێمی دیکتاتۆری بەعس لە عێراق تێدەپەڕێت، ئەو ئۆپەراسیۆنەی کە لای زۆرینەی عێراقییەكان بە پرۆسەی ئازادیی عێراق ناسێنراوە و لای بەشێكی دیكەش وەک ئۆپەراسیۆنی داگیركردنی عێراق یان جەنگی سێهەمی كەنداو ناودەبرێت.

 

پەیامی فەرمی: محەممەد شیاع سوودانی، سەرۆکوەزیرانی عێراق بەو بۆنەیەوە پەیامێکی بڵاوکردەوە و ڕایگەیاند: ئەم ڕژێمە نەدەکەوت ئەگەر ئەو قوربانییە گەورەیەی گەلەکەمان لە پێکهاتە جیاجیاکان و هەموو هێزە ئیسلامی و نیشتمانییەکان نەبوایە.

- دەسەڵاتی پەروەردگار وایکرد ڕووخانی ڕژێمی بەعسی ستەمکار هاوکات بێت لەگەڵ ساڵیادی شەهیدبوونی ئایەتوڵڵا سەید محەممەد باقر سەدر و خاتوو ئەمینە سەدری خوشکی.

- لەکاتی بەرزڕاگرتنی ئەم یادە، جەخت لەسەر گرنگی ئەو دەستکەوتانە دەکەینەوە کە گەلە بەڕێزەکەمان بەدەستی هێناوە لە دامەزراندنی سیستمێکی دیموکراسی بۆ ئەوەی مافەکانی هەموو عێراقییەکان بەپێی دەستوور و یاسا دەستەبەر بکات.

-سوپاس بۆ خوا ئەمڕۆ وڵاتەکەمان لە ئارامی و سەقامگیرییەکی بەرچاودایە لەگەڵ دەستپێکردنی چەرخی ئاوەدانکردنەوە و گەشەپێدان کە حکومەتەکەمان هەر لەسەرەتای کارە جێبەجێکارییەکانییەوە بەپەرۆشە بۆ بەدیهێنانی، لەڕێگەی هەنگاونان لەسەر ڕێڕەوی بوونیادنانی سیاسی و چاکسازی ئابووری و بەدیهێنانی خواستەکانی ڕۆڵەکانی وڵاتە ئازیزەکەمان.

 

باکگراوند: ڕۆژی 20ـی ئازار 2003، بە بەشداری 300 هەزار و 884 سەرباز، هێرشی وڵاتانی ھاوپەیمان بە سەرۆکایەتیی ئەمریکا بۆ سەر عێراق دەستی پێکرد و ڕۆژی 9ی نیسان کۆتایی بە حکومڕانی 35 ساڵەی بەعس لە عێراق هێنرا.