مستەفا کازمی لەبارەی بەشداریکردن لە هەڵبژاردنی داهاتوو ڕوونکردنەوە دەدات

ئاڤا نیوز

سەرۆکوەزیرانی پێشووی عێراق ڕایدەگەیەنێت، پشووێکی باشم وەرگرت و ئێستاش کاتی کاردنە و ئاماژە بۆ ئەوە دەکات، ئەگەر بەشداریی هەڵبژاردنی داهاتووی عێراق بکات، دەبێت گەرەنتی "هەڵبژاردنێکی پاک و بێگەرد" بکرێت.

 

چیرۆکی سەرەکی: مستەفا کازمی، سەرۆکوەزیرانی پێشووی عێراق لە دیدارێکی ڕۆژنامەوانیدا هۆکاری گەڕانەوەی بۆ عێراق و خواستی بۆ بەشداریکردن لە هەڵبژاردنەکانی داهاتووی عێراق و چەند بابەتێکی دیکە دەخاتەڕوو.

 

لێدوانی ڕۆژنامەوانی: مستەفا کازمی، سەرۆکوەزیرانی پێشووی عێراق ڕایگەیاند: لە دوای تەواوبوونی ماوەی بەرپرسیارێتییە نیشتمانییەکەم، بڕیارم دا عێراق جێبهێڵم و ئەم بڕیارە هۆکار و پاڵنەری خۆی هەبوو لەسەر ئاستی کەسیی، زۆر پێویستم بە پشوویەک بوو دوای ئەم ماوە درێژە لە کارکردن.

- بەردەوام چاودێریی دۆخەکەم کردووە و هەڵسەنگاندنم بۆ کردووە، دواتر گۆڕانکارییە هەرێمییەکان و کاریگەرییەکانی لەسەر جیهانی عەرەبی زیاتر هانیدام جارێکی دیکە بە شێوەیەکی ڕوون و ئاشکرا دەست بە کارکردن بکەمەوە.

- قسەکردن لەبارەی بەشداریم لە هەڵبژاردنەکان و دروستکردنی هاوپەیمانێتی بۆ کاتی گونجاو هەڵدەگرین، بژاردەی جۆراوجۆرمان لەبەردەستدایە.

- لە پەیوەندیی بەردەوامداین لەگەڵ ئەو هێز و لایەنانەی کە دیدگایان لەگەڵ ئێمە یەکدەگرێتەوە و ئەم بابەتە هێشتا لەژێر لێکۆڵینەوە و گفتوگۆدایە.

- ئەگەر بڕیارماندا بەشداری هەڵبژاردن بکەین، پێویستە گەرەنتی هەڵبژاردنێکی پاک و بێگەرد بکرێت، هەموو لایەنەکانیش بەرپرسیارێتی مێژوویی خۆیان لەئەستۆ بگرن.