قۆناغی دووەمی کارەبای 24 کاتژمێری لە سلێمانی دەستپێدەکات

ئاڤا نیوز

بەڕێوەبەرایەتیی گشتیی کارەبای سلێمانی لە بەشێکی دیکەی ناوچەکانی سەنتەری پارێزگای سلێمانی، ئامادەکاری بۆ جێبەجێکردنی پڕۆژەی ڕووناکی دەکات و هەزاران هاوبەشی دیکە سوودمەند دەبن.

وێنە گەورەکە: پڕۆژەی ڕووناکی  یەکێکە لە پڕۆژە ستراتیژی و گرنگەکانی کابینەی نۆیەم، لە سلێمانی دەستیپێکردووە، زیاتر لە مانگێکە لەشەش گەڕەک و بەشێکی بازاڕی شارەکە کارەبا 24 کاتژمێرییە.

لێدوانی فەرمی: سیروان محەممەد، گوتەبێژی کارەبای سلێمانی بە ئاڤای گوت، "ئێستا ئامادەکاری بۆ چەند گەڕەكێکی دیکە دەکەین، میتەرەکانیان سیرڤای دەکرێت و لە پی ئێم ئۆی پڕۆژەی ڕووناکی تۆماردەکرێن و کارەبایان دەبێت بە 24 کاتژمێری و 14 فیدەر دەگرێتەوە."

ئەمەش بزانە: مانگی 10ـی ساڵی ڕابردوو سەرۆکوەزیران مەسرور بارزانی، لە گەڕەکی شادی هەولێر پڕۆژەی ڕووناکی ڕاگەیاند، لەو کاتەوە تا ئێستا 415 هەزار هاونیشتمانی کارەبای 24 کاتژمێرییان بۆ دابینکراوە.