پەرلەمانتارێکی عێراق بەهۆی "دۆسیەی گیان لەدەستدانی ئەندازیارەکە" دەستلەکاردەکێشێتەوە

ئاڤا نیوز

ئەندامێکی پەرلەمانی عێراق کە هاوکات ئەندامی لیژنەی پەرلەمان بوو بۆ لێکۆڵینەوە لە دۆسیەی گیان لەدەستدانی ئەندازیار بەشیر خالید، ڕایگەیاند، وەک ناڕەزاییەک بەرامبەر ڕژانی "خوێنی خەڵکی بێتاوان" بڕیاریدا دەست لە ئەندامییەتی پەرلەمان بکێشێتەوە، لەسەر دۆسیەی کوژرانی ئەندازیارەکەش لە پەرلەمان میوانداری بەرپرسانی ئەمنیی دەکرێت.

ئەوەی پێویستە بیزانیت: ئەو ئەندازیارەی بەغدا کە لەگەڵ ئەفسەرێکی وەزارەتی ناوخۆی عێراق بە پلەی لیوا توشی ناکۆکی ببوو و لە زیندان ئەشکەنجەیەکی زۆر درابوو، سەرلەبەیانی 7ی ئەم مانگە لە نەخۆشخانەیەکی بەغدا گیانی لەدەستدا.

ڕاگەیێنراوی فەرمی: حسێن عەرەب، ئەندامی پەرلەمانی عێراق و ئەندامی لیژنەی لێکۆڵینەوە لە گیانلەدەستدانی ئەندازیار بەشیر خالید ڕایگەیاند، وەک ناڕەزاییەک بەرامبەر ڕژانی "خوێنی خەڵکی بێتاوان" داواکاری لەدەستلەکارکێشانەوەی پێشکەش بە سەرۆکایەتی پەرلەمان کرد.

- پێشتر ئەو پەرلەمانتارە ئاماژەی بەوەکردبوو، ئەندازیار بەشیر لەناو دامەزراوەکانی وەزارەتی ناوخۆدا کوژراوە و ئەوان تۆمەتبارن، بۆیەش بەرپرسەکانیان زانیاریی دژبەیەک لەسەر دۆسییەکە بڵاودەکەنەوە.

لەلایەکی دیکە: پەرلەمانی عێراق لە کۆبوونەوەی ئەمڕۆ پێنجشەممەیدا و پەیوەست بە "دۆسیەی گیانلەدەستدانی ئەندازیارەکە" داوای لە لیژنەی پەرلەمانی تایبەت بەو دۆسییەیە کرد میوانداریی بەرپرسانی ئەمنی پەیوەندیدار بە گیانلەدەستدانی ڕاگیراو بەشیر خالید بکەن و ڕاسپاردەی خۆیان بەرزبکەنەوە، تا پەرلەمان بڕیاری پێویستی لەبارەوە دەربکات.