سوودانی بۆ سەرۆک بارزانی جەخت لە پرەنسیپی هاوبەشی نیشتمانی دەکاتەوە

ئاڤا نیوز

سەرۆکوەزیرانی عێراق و لە کۆبوونەوەی لەگەڵ سەرۆک بارزانی، جەخت لە پرەنسیپی هاوبەشی نیشتمانی و ڕووبەڕووبوونەوەی ئاستەنگە نێوخۆیی و دەرەکییەکان و هاوکاری نێوان حکومەتی فیدراڵی و حکومەتی هەرێمی کوردستان دەکاتەوە.

 

چیرۆکی سەرەکی: شەممە 2025-4-12، محەممەد شیاع سوودانی، سەرۆکوەزیرانی عێراق بە سەردانێکی فەرمی گەیشتە هەولێری پایتەخت و لەلایەن سەرۆکوەزیران مەسرور بارزانی پێشوازیی لێکرا و دوای کۆبوونەوەی لەگەڵ سەرۆکوەزیران لە هاوینەهەواری پیرمام لەگەڵ سەرۆک بارزانی کۆبووەوە.

 

ڕاگەیێنراویی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق لە کۆبوونەوەکەدا تیشک خرایە سەر بارودۆخ و کۆی دۆسیەکان لەسەر ئاستی نیشتمانی، لە چوارچێوەی پابەندبوونی حکومەت بە پرەنسیپی هاوبەشی نیشتمانی و پەیوەندی لەگەڵ هێزە سیاسییەکان.

- لە میانی دیدارەکەدا باس لە ڕێگاکانی بەرزکردنەوەی تواناکانی عێراق کرا لە بەرامبەر ئاستەنگە ناوخۆیی و دەرەکییەکان، هاوکاری نێوان حکومەتی فیدراڵی و حکومەتی هەرێمی کوردستان و هەموو بابەتەکانی پەیوەست بە شایستە نیشتمانییەکان.

- سوودانی پاڵپشتی خۆی بۆ گفتوگۆی نێوان هێزە سیاسییەکانی هەرێمی کوردستان لە پێکهێنانی حکومەت دەربڕی و داوای کرد پەلە لە پێکهێنانی حکومەت بکرێت.

- لای خۆیەوە سەرۆک بارزانی ستایشی سیاسەتی هاوسەنگی حکومەتی فیدراڵی بەرامبەر پێشهاتەکانی ناوچەکە و پابەندبوونی بە پاراستنی بەرژەوەندییەکانی عێراق و پابەندبوونی بە پەیوەندیکردن و ڕاوێژکردن لەگەڵ هێزە سیاسییە نیشتمانییەکان لەسەر هەموو پرسەکان کرد.