وەزارەتی خوێندنی باڵا داوای پلەبەرزکردنەوەی پێنج هەزار مامۆستا و فەرمانبەر دەکات

ئاڤا نیوز

 

وەزارەتی خوێندنی باڵا و توێژینەوەی زانستی، پاڵپشت بە بڕیاڕێکی دەستەی بەرزەفتکردنی فەرمانبەران، داوا لە وەزارەتی دارایی دەکات پلەی زیاتر لە پێنج هەزار مامۆستا و فەرمانبەر بەرز بکاتەوە.

 

وێنە گەورەکە: لە ساڵی 2016ەوە بەهۆی قەیرانی دارایی و بڕینی بودجەی کوردستان لەلایەن بەغداوە پلەبەزکردنەوەی فەرمانبەران بە هەموو شێوەیەک ڕاگیراوە، بەم هۆیەوەش پلە و مووچەی هەزاران مامۆستا و فەرمانبەر بەرزنەکراوەتەوە کە بڕوانامەی بەرزتریان هێناوە.

ئەوەی پێویستە بیزانیت: دەستەی بەرزەفتکردنی فەرمانبەران لە ئەنجوومەنی شوورای هەرێمی کوردستان لەسەر سکاڵای زانکۆی گەرمیان، ڕۆژی 22-10-2024، بڕیاری دا هەر مامۆستا و فەرمانبەرێک لەکاتى بەجێهێنانی ئەرکەکەی، بەپێی یاسا و ڕێنماییەکان لە پسپۆرییەکەى خۆیدا بڕوانامەی بەرزتری بەدەست هێنابێت، دەبێت بەپێى بڕوانامەکەى پلە و مووچەی بۆ بەرزبکرێتەوە.

 

زانیاریی زیاتر: بۆ نموونە فەرمانبەرێک کە بە بڕوانامەی بەکالۆریۆس دامەزراوە، لەم نۆ ساڵەی ڕابردوودا ماستەر و دکتۆراشی خوێندووە، بەڵام هێشتا هەر مووچەی بەکالۆریۆس وەردەگرێت، بەپێی بڕیارەکە دەبێت مووچەکەی بڕوانامە نوێیەکەی بۆ ببەسترێت.

 

ڕێککەوتنەکە بەمشێوەیە: بڕیارەکە تەنیا ئەو مامۆستا و فەرمانبەرانە دەگرێتەوە بڕوانامەی بەرزتریان بەدەستهێناوە کە ژمارەیان زیاتر لە پێنج هەزار کەسە، نەوەک فەرمانبەران بەهۆی خزمەتەوە پلەیان بەرز بکرێتەوە.

 

لێدوانی فەرمی: د. توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا بە ئاڤای ڕاگەیاند: ئەم نووسراوە بۆ ئەوەیە بزانین وەزارەتی دارایی و ئابووری لەبارەی پلە بەرزکردنەوەی ئەو فەرمانبەرانە وەڵامیان چی دەبێت. جگە لە زانکۆی گەرمیان لە هەموو زانکۆکان فەرمانبەری هاوشێوە هەیە و پێویستە پلە بەرزکردنەوەیان بۆ بکرێت.

ئەوەی پێویستە  بیزانیت: وەزارەتی خوێندنی باڵا لەگەڵ ناردنی داواکاری پلەبەرزکردنەوە بۆ وەزارەتی دارایی کە وەک هەنگاوی یەکەم تەنیا هی فەرمانبەرانی زانکۆی گەرمیانی ناردووە، دەقی بڕیارەکەی ئەنجوومەنی شوراشی هاوپێچ کردووە.

 

ئەمەش بزانە: لە لیستی مووچەی ئەمساڵیش سەرجەم یەکە ژمێریارییەکانی وەزارەت و فەرمانگەکان ئاگادار کراونەتەوە  زیادکردنی مووچە و دەرماڵە و پلەبەرزکردنەوە بە هەموو شێوەیەک ڕابگرن، بۆیە نازانرێت پلە و مووچەی ئەو فەرمانبەرە چۆن چاک دەکرێت.